Acts 25 — TCG

Paul's Trial Before Festus

25Verse 1Φῆστος οὖν ἐπιβὰς τῇ⁺ἐπαρχίᾳ, μετὰ τρεῖς ἡμέρας ἀνέβη εἰς Ἱεροσόλυμα ἀπὸ⁺Καισαρείας.^{Verse 2}Ἐνεφάνισαν⁺δὲ αὐτῷ⁺ὁ ἀρχιερεὺς καὶ οἱ πρῶτοι τῶν Ἰουδαίων κατὰ τοῦ Παύλου, καὶ παρεκάλουν αὐτόν,^{Verse 3}αἰτούμενοι χάριν κατ᾽ αὐτοῦ, ὅπως μεταπέμψηται αὐτὸν εἰς Ἱερουσαλήμ, ἐνέδραν ποιοῦντες ἀνελεῖν αὐτὸν κατὰ τὴν ὁδόν.^{Verse 4}Ὁ μὲν οὖν Φῆστος ἀπεκρίθη, τηρεῖσθαι τὸν Παῦλον⁺ἐν Καισαρείᾳ, ἑαυτὸν δὲ μέλλειν ἐν τάχει ἐκπορεύεσθαι.^{Verse 5}Οἱ οὖν⁺δυνατοὶ ἐν ὑμῖν, φησί,⁺συγκαταβάντες, εἴ τί ἐστιν⁺ἐν τῷ ἀνδρὶ τούτῳ, κατηγορείτωσαν αὐτοῦ.^{Verse 6}Διατρίψας δὲ ἐν αὐτοῖς ἡμέρας⁺πλείους ἢ δέκα, καταβὰς εἰς⁺Καισάρειαν, τῇ ἐπαύριον καθίσας ἐπὶ τοῦ βήματος ἐκέλευσε τὸν Παῦλον ἀχθῆναι.^{Verse 7}Παραγενομένου δὲ αὐτοῦ,⁺περιέστησαν οἱ ἀπὸ Ἱεροσολύμων καταβεβηκότες Ἰουδαῖοι, πολλὰ καὶ βαρέα⁺αἰτιώματα⁺φέροντες κατὰ τοῦ Παύλου, ἃ οὐκ ἴσχυον ἀποδεῖξαι,^{Verse 8+}ἀπολογουμένου αὐτοῦ ὅτι Οὔτε εἰς τὸν νόμον τῶν Ἰουδαίων, οὔτε εἰς τὸ ἱερόν, οὔτε εἰς Καίσαρά τι ἥμαρτον.^{Verse 9}Ὁ Φῆστος δὲ⁺τοῖς Ἰουδαίοις θέλων χάριν καταθέσθαι, ἀποκριθεὶς τῷ Παύλῳ εἶπε, Θέλεις εἰς⁺Ἱεροσόλυμα ἀναβάς, ἐκεῖ περὶ τούτων⁺κρίνεσθαι⁺ἐπ᾽ ἐμοῦ;^{Verse 10}Εἶπε δὲ ὁ Παῦλος,⁺Ἐπὶ τοῦ βήματος Καίσαρος ἑστώς εἰμι, οὗ με δεῖ κρίνεσθαι· Ἰουδαίους οὐδὲν⁺ἠδίκησα, ὡς καὶ σὺ κάλλιον ἐπιγινώσκεις.^{Verse 11}Εἰ μὲν⁺γὰρ ἀδικῶ καὶ ἄξιον θανάτου πέπραχά τι, οὐ παραιτοῦμαι τὸ ἀποθανεῖν· εἰ δὲ οὐδέν ἐστιν ὧν οὗτοι κατηγοροῦσί μου, οὐδείς με δύναται αὐτοῖς χαρίσασθαι. Καίσαρα ἐπικαλοῦμαι.^{Verse 12}Τότε ὁ Φῆστος⁺συλλαλήσας μετὰ τοῦ συμβουλίου ἀπεκρίθη, Καίσαρα ἐπικέκλησαι; Ἐπὶ Καίσαρα πορεύσῃ.

Festus Consults King Agrippa

^{Verse 13}Ἡμερῶν δὲ διαγενομένων τινῶν, Ἀγρίππας ὁ βασιλεὺς καὶ Βερνίκη κατήντησαν εἰς⁺Καισάρειαν,⁺ἀσπασάμενοι τὸν Φῆστον.^{Verse 14}Ὡς δὲ πλείους ἡμέρας⁺διέτριβεν ἐκεῖ, ὁ Φῆστος τῷ βασιλεῖ ἀνέθετο τὰ κατὰ τὸν Παῦλον, λέγων, Ἀνήρ τίς ἐστι⁺καταλελειμμένος ὑπὸ Φήλικος δέσμιος,^{Verse 15}περὶ οὗ, γενομένου μου εἰς Ἱεροσόλυμα, ἐνεφάνισαν οἱ ἀρχιερεῖς καὶ οἱ πρεσβύτεροι τῶν Ἰουδαίων, αἰτούμενοι κατ᾽ αὐτοῦ⁺δίκην.^{Verse 16}Πρὸς οὓς ἀπεκρίθην, ὅτι οὐκ ἔστιν ἔθος Ῥωμαίοις χαρίζεσθαί τινα ἄνθρωπον⁺εἰς ἀπώλειαν, πρὶν ἢ ὁ κατηγορούμενος κατὰ πρόσωπον ἔχοι τοὺς κατηγόρους, τόπον τε ἀπολογίας λάβοι περὶ τοῦ ἐγκλήματος.^{Verse 17}Συνελθόντων οὖν⁺αὐτῶν ἐνθάδε, ἀναβολὴν μηδεμίαν ποιησάμενος, τῇ ἑξῆς καθίσας ἐπὶ τοῦ βήματος, ἐκέλευσα ἀχθῆναι τὸν ἄνδρα·^{Verse 18}περὶ οὗ σταθέντες οἱ κατήγοροι οὐδεμίαν αἰτίαν⁺ἐπέφερον ὧν⁺ὑπενόουν ἐγώ,^{Verse 19}ζητήματα δέ τινα περὶ τῆς ἰδίας δεισιδαιμονίας εἶχον πρὸς αὐτόν, καὶ περί τινος Ἰησοῦ τεθνηκότος, ὃν ἔφασκεν ὁ Παῦλος ζῇν.^{Verse 20}Ἀπορούμενος δὲ ἐγὼ⁺τὴν περὶ⁺τούτου ζήτησιν, ἔλεγον, εἰ βούλοιτο πορεύεσθαι εἰς⁺Ἱερουσαλήμ, κἀκεῖ κρίνεσθαι περὶ τούτων.^{Verse 21}Τοῦ δὲ Παύλου ἐπικαλεσαμένου τηρηθῆναι αὐτὸν εἰς τὴν τοῦ Σεβαστοῦ διάγνωσιν, ἐκέλευσα τηρεῖσθαι αὐτόν, ἕως οὗ⁺πέμψω αὐτὸν πρὸς Καίσαρα.^{Verse 22}Ἀγρίππας δὲ πρὸς τὸν Φῆστον⁺ἔφη, Ἐβουλόμην καὶ αὐτὸς τοῦ ἀνθρώπου ἀκοῦσαι.⁺Ὁ δέ, Αὔριον, φησίν, ἀκούσῃ αὐτοῦ.

Paul Brought Before King Agrippa

^{Verse 23}Τῇ οὖν ἐπαύριον, ἐλθόντος τοῦ Ἀγρίππα καὶ τῆς Βερνίκης μετὰ πολλῆς φαντασίας, καὶ εἰσελθόντων εἰς τὸ ἀκροατήριον, σύν τε⁺τοῖς χιλιάρχοις καὶ ἀνδράσι τοῖς κατ᾽ ἐξοχὴν⁺οὖσι τῆς πόλεως, καὶ κελεύσαντος τοῦ Φήστου, ἤχθη ὁ Παῦλος.^{Verse 24}Καί φησιν ὁ Φῆστος, Ἀγρίππα βασιλεῦ, καὶ πάντες οἱ⁺συμπαρόντες ἡμῖν ἄνδρες, θεωρεῖτε τοῦτον περὶ οὗ⁺πᾶν τὸ πλῆθος τῶν Ἰουδαίων⁺ἐνέτυχόν μοι ἔν τε Ἱεροσολύμοις καὶ ἐνθάδε,⁺ἐπιβοῶντες μὴ δεῖν⁺ζῇν αὐτὸν μηκέτι.^{Verse 25}Ἐγὼ δὲ⁺καταλαβόμενος μηδὲν ἄξιον⁺θανάτου αὐτὸν πεπραχέναι,⁺καὶ αὐτοῦ δὲ τούτου ἐπικαλεσαμένου τὸν Σεβαστόν, ἔκρινα πέμπειν⁺αὐτόν.^{Verse 26}Περὶ οὗ ἀσφαλές τι γράψαι τῷ κυρίῳ οὐκ ἔχω. Διὸ προήγαγον αὐτὸν ἐφ᾽ ὑμῶν, καὶ μάλιστα ἐπὶ σοῦ, βασιλεῦ Ἀγρίππα, ὅπως τῆς ἀνακρίσεως γενομένης σχῶ⁺τι γράψαι.^{Verse 27}Ἄλογον γάρ μοι δοκεῖ, πέμποντα δέσμιον, μὴ καὶ τὰς κατ᾽ αὐτοῦ αἰτίας σημᾶναι.