Numbers 34 — W88
34Verse 1And the Lord spak to Moises,Verse 2and seide, Comaunde thou to the sones of Israel, and thou schalt seie to hem, Whanne ye han entrid in to the lond of Canaan, and it bifelde in to possessioun `to you bi lot, it schal be endid bi these endis.Verse 3The south part schal bigynne at the wildirnesse of Syn, which is bisidis Edom, and it schal haue termes ayens the eest,Verse 4the saltiste see, whiche termes schulen cumpasse the south coost bi the `stiynge of Scorpioun, `that is, of an hil clepid Scorpioun, so that tho passe in to Senna, and come to the south, `til to Cades Barne; fro whennus the coostis schulen go out to the town, Abdar bi name, and schulen strecche forth `til to Asemona;Verse 5and the terme schal go bi cumpas fro Assemona `til to the stronde of Egipt, and it schal be endid bi the brynke of the grete see.Verse 6Forsothe the west coost schal bigynne at the greet see, and schal be closid bi that ende.Verse 7Sotheli at the north coost, the termes schulen bigynne at the greet see, and schulen come `til to the hiyeste hil,+Verse 8fro which tho schulen come in to Emath, `til to the termes of Sedada;Verse 9and the coostis schulen go `til to Ephrona, and the town of Enan. These schulen be the termes in the north part.Verse 10Fro thennus thei schulen mete coostis ayens the eest coost, fro the town Henan `til to Sephama;Verse 11and fro Sephama termes schulen go doun in to Reblatha, ayens the welle `of Daphnyn; fro thennus tho schulen come ayens the eest to the se of Cenereth;Verse 12and tho schulen strecche forth `til to Jordan, and at the laste tho schulen be closid with the salteste see. Ye schulen haue this lond bi hise coostis `in cumpas.Verse 13And Moises comaundide to the sones of Israel, and seide, This schal be the lond which ye schulen welde bi lot, and which the Lord comaundide to be youun to nyne lynagis and to the half lynage;Verse 14for the lynage of the sones of Ruben, bi her meynees, and the lynage of the sones of Gad, bi kynrede and noumbre, and half the lynage of Manasses,Verse 15that is, twey lynagis and an half, han take her part ouer Jordan, ayens Jerico, at the eest coost.Verse 16And the Lord seide to Moises,Verse 17These ben the `names of men that schulen departe the lond to you, Eleazar, preest, and Josue, the sone of Nun, and of each lynage, o prynce;Verse 18of whiche these ben the names, of the lynage of Juda,Verse 19Caleph, the sone of Jephone;Verse 20of the lynage of Symeon, Samuhel, the sone of Amyud;Verse 21of the lynage of Beniamyn, Heliad, sone of Casselon;Verse 22of the lynage of the sones of Dan, Bochi, sone of Jogli; of the sones of Joseph,Verse 23of the lynage of Manasses, Hamyel, sone of Ephoth;Verse 24of the lynage of Effraym, Camuhel, sone of Septhan;Verse 25of the lynage of Zabulon, Elisaphan, sone of Pharnat;Verse 26of the lynage of Isacar, duyk Phaltiel, the sone of Ozan; of the lynage of Azer,Verse 27Abyud, the sone of Salomy;Verse 28of the lynage of Neptalym, Fedahel, the sone of Amyud.Verse 29These men it ben, to whiche the Lord comaundide, that thei schulden departe to the sones of Israel the lond of Chanaan.