Numbers 35 — W88
35Verse 1And the Lord spak these thingis to Moises, in the feeldi places of Moab, aboue Jordan,Verse 2ayens Jericho, Comaunde thou to the sones of Israel, that thei yyue to dekenes of her possessiouns,Verse 3citees to dwelle,+and the suburbabis of tho bi cumpas, that thei dwelle in `the citees, and the suburbabis be to beestis, and `werk beestis;Verse 4whiche suburbabis schulen be strecchid forth fro the wallis of citees with outforth `bi cumpas, in the space of a thousynde paacis;Verse 5ayens the eest schulen be two thousynde cubitis, and ayens the south in lijk manere schulen be two thousynde cubitis, and at the see that biholdith to the west schal be the same mesure, and the north coost schal be endid bi euene terme. And the citees schulen be in the myddis, and the suburbabis with outforth.Verse 6Forsothe of tho citees whiche ye schulen yyue to dekenes, sixe schulen be departid in to helpis of fugityues, `ether of fleynge men, that he that schedde blood, fle to tho; and outakun these sixe, ye schulen yyue to dekenes othere two and fourti citees,Verse 7that is, togidere eiyte and fourti, with her surburbabis.Verse 8And tho citees that schulen be youun of the possessiouns of sones of Israel, schulen be takun awey, mo fro hem that han more, and fewere `schulen be takun awey fro hem that han lesse, alle bi hem silf schulen yyue bi the mesure of her eritage, citees to dekenes.Verse 9The Lord seide to Moises,Verse 10Spek thou to the sones of Israel, and thou schalt seie to hem, Whanne ye han passid Jordan, in the lond of Canaan,Verse 11deme ye whiche citees owen to be in to the helpis of fugityues, whiche not wilfuli han sched blood.Verse 12In whiche whanne the fleere hath fled, the kynesman of hym that is slayn, schal not mow sle hym, til he stonde in the siyt of the multitude, and the cause of hym be demed.Verse 13Forsothe of tho citees that ben departid to the helpis of fugityues,Verse 14thre schulen be ouer Jordan, and thre in the lond of Canaan;Verse 15as wel to the sones of Israel as to comelyngis and pilgryms; that he fle to tho citees, that schedde blood not wilfuli.Verse 16If ony man smytith a man with yrun, and he that is smytun is deed, `the smyter schal be gilti of mansleyng, and he schal die.Verse 17If he castith a stoon, and a man is deed bi the strook, he schal be punyschid in lijk maner.Verse 18If a man smytun with a staf dieth, he schal be vengid bi `the blood of the smytere.Verse 19The niy kynesman of hym that is slayn schal sle the mansleere; anoon as he takith hym, `that is, the manquellere, he schal sle hym.Verse 20If bi haterede a man hurtlith, `ethir schoufith, `a man, ethir castith ony thing in to hym bi aspiyngis,Verse 21ether whanne he was enemy, smoot with hond, and he is deed, the smytere schal be gilti of mansleyng. The kynesman `of him that is slayn, anoon as he findith him, `that is, the sleere, schal sle hym.Verse 22That if bi sudeyn caas, and without hatrede and enemytees,Verse 23he doith ony thing of these;Verse 24and this is preued in heryng `of the puple, and the questioun of blood is discussid bitwixe the smytere and the kynesman,Verse 25the innocent schal be delyuered fro the hond of the vengere, and bi sentence of iugis he schal be led ayen in to the citee, to which he fledde, and he schal dwelle there, til the grete preest die, which is anoyntid with oile.Verse 26If the sleere is foundun with out the coostis `of the citees that ben asigned to exilid men,Verse 27and is slayn of him that is vengere, he that sleeth him, `that is, the exilid man, schal be with out gilt;Verse 28for the exilid man ouyte sitte in the citee `til to the `deth of the bischop; forsothe aftir that thilke bischop is deed, the mansleere schal turne ayen in to his lond.Verse 29These schulen be euerlastynge and lawful thingis in alle youre dwellyngis.Verse 30A mansleere schal be punyschid vndur witnessis; no man schal `be dampned at the witnessyng of o man.Verse 31Ye schulen not take prijs of him which is gilti of blood, anoon and he schal die.Verse 32Men exilid, and fugityues, schulen not mow turne ayen in ony maner in to her citees, bifore the deeth of the bischop, lest ye defoulen the lond of youre abitacioun,Verse 33which is defoulid bi the blood of innocent men; and it may not be clensid in other maner, no but bi the blood of hym, that schedde the blood of anothir man.Verse 34And so youre possessioun schal be clensid, for Y schal dwelle with you; for Y am the Lord, that dwelle among the sones of Israel.