Genesis 9 — W88
9Verse 1And God blisside Noe and hise sones, and seide to hem, Encreesse ye, and be ye multiplied, and fille ye the erthe;Verse 2and youre drede and tremblyng be on alle vnresonable beestis of erthe, and on alle briddis of heuene, with alle thingis that ben moued in erthe; alle fischis of the see ben youun to youre hond.Verse 3And al thing which is moued and lyueth schal be to you in to mete; Y have youe to you alle thingis as greene wortis,Verse 4outakun that ye schulen not ete fleisch with blood,Verse 5for Y schal seke the blood of youre lyues of the hoond of alle vnresonable beestis and of the hoond of man, of the hoond of man and of hys brother Y schal seke the lijf of man.Verse 6Who euere schedith out mannus blood, his blood schal be sched; for man is maad to the ymage of God.Verse 7Forsothe encreesse ye, and be ye multiplied, and entre ye on erthe, and fille ye it, Also the Lord seide thes thingis to Noe,Verse 8and to his sones with him, Lo!Verse 9Y schal make my couenaunt with you, and with your seed after you,Verse 10and to ech lyuynge soule which is with you, as wel in briddis as in werk beestis and smale beestis of erthe, and to alle thingis that yeden out of the schip, and to alle vnresonable beestis of erthe.Verse 11Y schal make my couenaunt with you, and ech fleisch schal no more be slayn of the watris of the greet flood, nethir the greet flood distriynge al erthe schal be more.Verse 12And God seide, This is the signe of boond of pees, which Y yyue bitwixe me and you, and to ech lyuynge soule which is with you, in to euerlastynge generaciouns.Verse 13Y schal sette my bowe in the cloudis, and it schal be a signe of boond of pees bitwixe me and erthe;Verse 14and whanne Y schal hile heuene with cloudis, my bowe schal appere in the cloudis,Verse 15and Y schal haue mynde of my boond of pees which Y made with you, and with ech soule lyuynge, that nurschith fleisch; and the watris of the greet flood schulen no more be to do awey al fleish.Verse 16And my bowe schal be in the cloudis, and Y schal se it, and Y schal haue mynde of euerlastynge boond of pees, which is maad bitwixe God and man, and ech soul lyuynge of al fleisch which is on erthe.Verse 17And God seide to Noe, This schal be a signe of boond of pees, which Y made bitwixe me and ech fleisch on erthe.Verse 18Therfore thei that yeden out of the schip weren Noe, Sem, Cham, and Japheth; forsothe Cham, thilke is the fadir of Chanaan.Verse 19These thre weren the sones of Noe, and al the kynde of men was sowun of hem on al erthe.Verse 20And Noe, an erthe tiliere, bigan to tile the erthe, and he plauntide a viner,Verse 21and he drank wyn, and was drunkun; and he was nakid, and lay in his tabernacle.Verse 22And whanne Cham, the fadir of Chanaan, hadde seien this thing, that is, that the schameful membris of his fadir weren maad nakid, he telde to hise tweye britheren with out forth.Verse 23And sotheli Sem and Jafeth puttiden a mentil on her schuldris, and thei yeden bacward, and hileden the schameful membris of her fadir, and her faces weren turned awei, and thei sien not the priuy membris of her fadir.Verse 24And forsothe Noe wakide of the wyn, and whanne he hadde lerned what thingis his lesse sone hadde do to hym,Verse 25he seide, Cursid be the child Canaan, he schal be seruaunt of seruauntis to hise britheren.Verse 26And Noe seide, Blessid be the Lord God of Sem,Verse 27and Chanaan be the seruaunt to Sem; God alarge Jafeth, and dwelle in the tabernaclis of Sem, and Chanaan be seruaunt of hym.Verse 28Forsothe Noe lyuede aftir the greet flood thre hundrid and fifti yeer;Verse 29and alle the daies of hym weren fillid nyn hundrid and fifty yeer, and he was deed.