Genesis 8 — W88
8Verse 1Forsothe the Lord hadde mynde of Noe, and of alle lyuynge beestis, and of alle werk beestis, that weren with hym in the schip; and brouyte a wynd on the erthe.Verse 2And watris weren decreessid, and the wellis of the see weren closid, and the wyndowis of heuene weren closid, and reynes of heuene weren ceessid.Verse 3And watrys turneden ayen fro erthe, and yeden ayen, and bigunnen to be decreessid aftir an hundrid and fifti daies.Verse 4And the schip restide in the seuenthe monthe, in the seuene and twentithe dai of the monthe, on the hillis of Armenye.Verse 5And sotheli the watrys yeden and decresiden til to the tenthe monethe, for in the tenthe monethe, in the firste dai of the monethe, the coppis of hillis apperiden.Verse 6And whanne fourti daies weren passid, Noe openyde the wyndow of the schip which he hadde maad, and sente out a crowe,Verse 7which yede out, and turnede not ayen til the watris weren dried on erthe.Verse 8Also Noe sente out a culuer aftir hym, to se if the watris hadden ceessid thanne on the face of erthe;Verse 9and whanne the culuer foond not where hir foot schulde reste, sche turnede ayen to hym in to the schip, for the watris weren on al erthe; and Noe helde forth his hoond, and brouyte the culuer takun in to the schip.Verse 10Sotheli whanne othere seuene daies weren abedun aftirward, eft he leet out a culuer fro the schip;Verse 11and sche cam to hym at euentid, and bare in hir mouth a braunche of olyue tre with greene leeuys. Therfor Noe vndirstood that the watris hadden ceessid on erthe;Verse 12and neuerthelesse he abood seuene othere daies, and sente out a culuer, which turnede `no more ayen to hym.Verse 13Therfor in the sixe hundrid and o yeer of the lijf of Noe, in the firste monethe, in the firste day of the monethe, watris weren decreessid on erthe; and Noe openede the roof of the schip, and bihelde and seiy that the face of the erthe was dried.Verse 14In the secunde monethe, in the seuene and twentithe dai of the monethe, the erthe was maad drie.Verse 15Sotheli the Lord spak to Noe;Verse 16and seide, Go out of the schip, thou, and thi wijf, thi sones, and the wyues of thi sones with thee;Verse 17and lede out with thee alle lyuynge beestis that ben at thee of ech fleisch, as wel in volatilis as in vnresonable beestis, and alle `reptils that crepen on erthe; and entre ye on the erthe, encreesse ye, and be ye multiplied on erthe.Verse 18Therfor Noe yede out, and hise sones, and his wijf, and the wyues of hise sones with hym;Verse 19but also alle lyuynge beestis, and werk beestis, and `reptils that crepen on erthe, bi her kynde, yeden out of the schip.Verse 20Forsothe Noe bildide an auter to the Lord, and he took of alle clene beestis and briddis, and offride brent sacrifices on the auter.Verse 21And the Lord sauerede the odour of swetnesse, and seide to hym, Y schal no more curse the erthe for men, for the wit and thouyt of mannus herte ben redi in to yuel fro yong wexynge age; therfor Y schal no more smyte ech lyuynge soule as Y dide;Verse 22in alle the daies of erthe, seed and ripe corn, coold and heete, somer and wyntir, nyyt and dai, shulen not reste.