Genesis 7 — W88
7Verse 1Also the Lord seide to Noe, Entre thou and al thin hous in to the schip, for Y seiy thee iust bifore me in this generacioun.Verse 2Of alle clene lyuynge beestis thou schalt take bi seuene and bi seuene, male and female; forsothe of vnclene lyuynge beestis thou schalt take bi tweyne and bi tweyne, male and female;Verse 3but also of volatils of heuene thou schalt take, bi seuene and bi seuene, male and female, that her seed be saued on the face of al erthe.Verse 4For yit and aftir seuene daies Y schal reyne on erthe fourti daies and fourti nyytis, and Y schal do awey al substaunce which Y made, fro the face of erthe.Verse 5Therfor Noe dide alle thingis whiche the Lord comaundide to hym.Verse 6And he was of sixe hundrid yeer, whanne the watris of the greet flood flowiden on erthe.Verse 7And Noe entride in to the schip, and hise sones, and hise wijf, and the wyues of his sones, entriden with him for the watris of the greet flood.Verse 8And of lyuynge beestis clene and vnclene, and of briddis of heuene, and of ech beeste which is moued on erthe,Verse 9bi tweyne and bi tweyne, male and female entriden to Noe in to the schip, as the Lord comaundide to Noe.Verse 10And whanne seuene daies hadden passid, the watris of the greet flood flowiden on erthe.Verse 11In the sixe hundrid yeer of the lijf of Noe, in the secunde moneth, in the seuententhe dai of the moneth, alle the wellis of the greet see weren brokun, and the wyndowis of heuene weren opened,Verse 12and reyn was maad on erthe fourti daies and fourti nyytis.Verse 13In the ende of that dai Noe entride, and Sem, Cham, and Japheth, hise sones, his wijf, and the wyues of hise sones, entriden with hem into the schip.Verse 14Thei entriden, and ech beeste bi his kynde, and alle werk beestis in her kynde, and ech beeste which is moued on erthe in his kynde, and ech volatil bi his kynde; alle briddis and alle volatils entriden to Noe in to the schip,Verse 15bi tweyne and bi tweyne of ech fleisch in whiche the spirit of lijf was.Verse 16And tho that entriden, entriden male and female of ech fleisch, as God comaundide to hym. And the Lord encloside hym fro with out-forth.Verse 17And the greet flood was maad fourti daies and fourti niytis on erthe, and the watris weren multiplied, and reiseden the schip on hiy fro erthe.Verse 18The watris flowiden greetli, and filliden alle thingis in the face of erthe. Forsothe the schip was borun on the watris.Verse 19And the watris hadden maistrie greetli on erthe, and alle hiye hillis vndur alle heuene weren hilid;Verse 20the watyr was hiyere bi fiftene cubitis ouer the hilis whiche it hilide.Verse 21And ech fleisch was wastid that was moued on erthe, of briddis, of lyuynge beestis, of vnresonable beestis, and of alle `reptilis that crepen on erthe.Verse 22Alle men, and alle thingis in whiche the brething of lijf was in erthe, weren deed.Verse 23And God dide awei al substaunce that was on erthe, fro man til to beeste, as wel a crepynge beeste as the briddis of heuene; and tho weren doon awei fro erthe. Forsothe Noe dwellide aloone, and thei that weren with hym in the schip.Verse 24And the watris of the greet flood ouereyeden the erthe an hundrid and fifti daies.