Numbers 1 — W88
1Verse 1And the Lord spak to Moises in the deseert of Synay, in the tabernacle of the boond of pees, in the firste day of the secounde monethe, in the tother yeer of her goyng out of Egipt,Verse 2and seide, Take ye `the summe of al the congregacioun of the sones of Israel, bi her kynredis, and howsis, and `the names of alle bi hem silf, whatVerse 3euer thing is of male kynde fro the twentithe yeere and aboue, of alle the stronge men of Israel; and thou and Aaron schulen noumbre hem bi her cumpanies.Verse 4And the princes of lynagis and of housis, in her kynredis, schulen be with you,Verse 5of whiche princes these ben the names; of Ruben, Elisur, the sone of Sedeur;Verse 6of Symeon, Salamyel, the sone of Suri Sadday;Verse 7of Juda, Naason, the sone of Amynadab; of Ysacar,Verse 8Nathanael, the sone of Suar;Verse 9of Zabulon, Eliab, the sone of Elon; sotheli of the sones of Joseph,Verse 10of Effraym, Elisama, the sone of Amyud; of Manasses, Gamaliel the sone of Phadussur;Verse 11of Beniamyn, Abidan, the sone of Gedeon;Verse 12of Dan, Aiezer, the sone of Amysadday;Verse 13of Aser, Fegiel, the sone of Ochran;Verse 14of Gad, Elisaphan, the sone of Duel;Verse 15of Neptalym, Hayra, the sone of Henam.Verse 16These weren the noblest princes of the multitude, bi her lynagis, and kynredis, and the heedis of the oost of Israel,Verse 17whiche pryncis Moises and Aaron token, with al the multitude of the comyn puple.Verse 18And thei gaderiden in the firste dai of the secounde monethe, and telden hem bi kynredis, and housis, and meynees, and heedis, and names of alle by hem silf, fro the twentithe yeer and aboue,Verse 19as the Lord comaundide to Moises.Verse 20And of Ruben the firste gendrid of Israel weren noumbrid, in the deseert of Synai, bi her generaciouns, and meynees, and housis, and bi the names of alle heedis, al thing that is of male kynde, fro `the twentithe yeer and aboue, of men goynge forth to batel,Verse 21sixe and fourti thousynd and fyue hundrid.Verse 22Of the sones of Symeon, bi her generaciouns, and meynees, and housis of her kyneredis, weren noumbrid, bi the names and heedis of alle, al that is of male kynde, fro `the twentithe yeer and aboue, of men goynge forth to batel,Verse 23nyn and fifty thousand and thre hundrid.Verse 24Of the sones of Gad, by generaciouns, and meynees, and housis of her kynredis, weren noumbrid, bi the names of alle, fro twenti yeer and aboue, alle men that yeden forth to batels,Verse 25fyue and fourti thousand sixe hundrid and fifti.Verse 26Of the sones of Juda, bi generaciouns, and meynees, and housis of her kynredis, by the names of alle, fro `the twentithe yeer and aboue, alle men that miyten go to batels,Verse 27weren noumbrid foure and seuenti thousand and sixe hundrid.Verse 28Of the sones of Ysacar, bi generaciouns, and meynees, and housis of her kynredis, bi the names of alle, fro `the twentithe yeer and aboue, alle men that yeden forth to batels,Verse 29weren noumbrid foure and fifti thousande and foure hundrid.Verse 30Of the sones of Zabulon, bi generaciouns, and meynees, and housis of her kynredis, weren noumbrid, bi the names of alle, fro `the twentithe yeer and aboue, alle men that myyten go forth to batels,Verse 31seuene and fifti thousynde and foure hundrid.Verse 32Of the sones of Joseph, of the sones of Effraym, bi generaciouns, and meynees, and housis of her kynredis, weren noumbrid, bi the names of alle, fro `the twentithe yeer and aboue, alle men that myyten go forth to batels,Verse 33fourti thousynde and fyue hundrid.Verse 34Forsothe of the sones of Manasses, bi generaciouns, and meynees, and housis of her kynredis, weren noumbrid, bi the names of alle, fro the twentithe yeer and aboue, alle men that myyten go forth to batels,Verse 35two and thretti thousynd and two hundrid.Verse 36Of the sones of Beniamyn, bi generaciouns, and meynees, and housis of her kynredis, weren noumbrid, bi the names of alle, fro twenti yeer and aboue, alle men that miyten go forth to batels,Verse 37fyue and thretti thousinde and foure hundrid.Verse 38Of the sones of Dan, bi generaciouns, and meynees, and housis of her kynredis, weren noumbrid, bi the names of alle, fro `the twentithe yere and aboue, alle men that myyten go forth to batels,Verse 39two and sixti thousynde and seuene hundrid.Verse 40Of the sones of Aser, bi generaciouns, and meynees, and housis of her kynredis, weren noumbrid, bi the names of alle, fro `the twentithe yeer and aboue, alle men that myyten go forth to batels,Verse 41fourti thousynde and a thousynde and fyue hundrid.Verse 42Of the sones of Neptalym, bi generaciouns, and meynees, and housis of her kynredis, weren noumbrid, bi the names of alle, fro `the twentithe yeer and aboue, alle men that myyten go forth to batels,Verse 43thre and fifty thousynde and foure hundrid.Verse 44These men it ben, whiche Moises and Aaron and the twelue princes of Israel noumbriden, alle bi the housis `of her kynredis.Verse 45And alle men of the sones of Israel bi her housis, and meynees, fro `the twentithe yeer and aboue, that myyten go forth to batels, weren togidereVerse 46sixe hundrid thousynde and thre thousynde of men, fyue hundred and fifti.Verse 47Sotheli the dekenes in the lynage of her meynes weren not noumbrid with hem.Verse 48And the Lord spak to Moises, and seide, `Nyle thou noumbre the lynage of Leuy,Verse 49nether sette thou the summe of hem with the sones of Israel;Verse 50but thou schalt ordeyne hem on the tabernacle of witnessing, and on alle the vessels therof, and what euer thing perteyneth to cerymonyes ether sacrifices. Thei schulen bere the tabernacle, and alle purtenaunces therof, and thei schulen be in seruyce, and schulen sette tentis bi the cumpas of the tabernacle.Verse 51Whanne me schal go, the dekenes schulen do doun the tabernacle; whanne the tentis schulen be sette, thei schulen `reise the tabernacle. Who euer of straungeris neiyeth, he schal be slayn.Verse 52Sotheli the sones of Israel schulen sette tentis, ech man bi cumpenyes, and gaderyngis, and his oost;Verse 53forsothe the dekenes schulen sette tentis bi the cumpas of the tabernacle, lest indignacioun be maad on the multitude of the sones of Israel; and thei schulen wake in the kepyngis of the `tabernacle of witnessyng.Verse 54Therfor the sones of Israel diden bi alle thingis whiche the Lord comaundide to Moises.