Matthew 15 — W88
15Verse 1Thanne the scribis and the Farisees camen to hym fro Jerusalem, and seiden,Verse 2Whi breken thi disciplis the tradiciouns of eldere men? for thei waisschen not her hondis, whanne thei eten breed.Verse 3He answeride, and seide to hem, Whi breken ye the maundement of God for youre tradicioun?Verse 4For God seide, Honoure thi fadir and thi modir, and he that cursith fadir or modir, die bi deeth.Verse 5But ye seien, Who euer seith to fadir or modir, What euere yifte is of me, it schal profite to thee;Verse 6and he hath not worschipid his fadir or his modir; and ye han maad the maundement of God voide for youre tradicioun.Verse 7Ypocritis, Isaie, the prophete, prophesiede wel of you,Verse 8and seide, This puple honourith me with lippis, but her herte is fer fro me;Verse 9and thei worschipen me `with outen cause, techynge the doctrines and maundementis of men.Verse 10And whanne the puple weren clepid to gidere to hym, he seide to hem, Here ye, and `vndurstonde ye.Verse 11That thing that entrith in to the mouth, defoulith not a man; but that thing that cometh out of the mouth, defoulith a man.Verse 12Thanne hise disciplis camen, and seiden to hym, Thou knowist, that, if this word be herd, the Farisees ben sclaundrid?Verse 13And he answeride, and seide, Eueri plauntyng, that my fadir of heuene hath not plauntid, shal be drawun vp by the roote.Verse 14Suffre ye hem; thei ben blynde, and leederis of blynde men. And if a blynd man lede a blynd man, bothe fallen doun in to the diche.Verse 15Petre answeride, and seide to hym, Expowne to vs this parable.Verse 16And he seide, Yit `ye ben also with oute vndurstondyng?Verse 17Vndurstonden ye not, that al thing that entrith in to the mouth, goith in to the wombe, and is sent out in to the goyng awei?Verse 18But tho thingis that comen forth fro the mouth, goon out of the herte, and tho thingis defoulen a man.Verse 19For of the herte goon out yuele thouytis, mansleyngis, auowtries, fornycaciouns, theftis, fals witnessyngis, blasfemyes.Verse 20Thes thingis it ben that defoulen a man; but to ete with hondis not waischun, defoulith not a man.Verse 21And Jhesus yede out fro thennus, and wente in to the coostis of Tire and Sidon.Verse 22And lo! a womman of Canane yede out of tho coostis, and criede, and seide to him, Lord, the sone of Dauid, haue merci on me; my douyter is yuel traueilid of a feend.Verse 23And he answeride not to hir a word. And hise disciplis camen, and preieden hym, and seiden, Leue thou hir, for she crieth aftir vs.Verse 24He answeride, and seide, Y am not sent, but to the scheep of the hous of Israel that perischiden.Verse 25And she cam, and worschipide hym, and seide, Lord, helpe me.Verse 26Which answeride, and seide, It is not good to take the breed of children, and caste to houndis.Verse 27And she seide, Yhis, Lord; for whelpis eten of the crummes, that fallen doun fro the bord of her lordis.Verse 28Thanne Jhesus answeride, and seide to hir, A! womman, thi feith is greet; be it doon to thee, as thou wolt. And hir douytir was helid fro that hour.Verse 29And whanne Jhesus hadde passed fro thennus, he cam bisidis the see of Galilee. And he yede vp in to an hil, and sat there.Verse 30And myche puple cam to hym, and hadden with hem doumbe men and crokid, feble and blynde, and many other; and thei castiden doun hem at hise feet. And he helide hem,Verse 31so that the puple wondriden seynge doumbe men spekynge, and crokid goynge, blynde men seynge; and thei magnyfieden God of Israel.Verse 32And Jhesus, whanne hise disciplis weren clepid to gidere, seide to hem, Y haue reuthe of the puple, for thei han abiden now thre daies with me, and han no thing to ete; and Y wole not leeue hem fastynge, lest thei failen in the weie.Verse 33And the disciplis seien to him, Wherof thanne so many looues among vs in desert, to fulfille so greet a puple?Verse 34And Jhesus seide to hem, Hou many looues han ye? And thei seiden, Seuene, and a fewe smale fisshis.Verse 35And he comaundide to the puple, to sitte to mete on the erthe.Verse 36And he took seuene looues and fyue fischis, and dide thankyngis, and brak, and yaf to hise disciplis; and the disciplis yauen to the puple.Verse 37And alle eten, and weren fulfillid, and thei token that that was left of relifes, seuene lepis fulle.Verse 38And thei that eten weren foure thousynde of men, with outen litle children and wymmen.Verse 39And whanne he hadde left the puple, he wente vp in to a boot, and cam in to the coostis of Magedan.