Matthew 14 — W88
14Verse 1In that tyme Eroude tetrarke, prynce of the fourthe part, herde the fame of Jhesu;Verse 2and seide to hise children, This is Joon Baptist, he is rysun fro deeth, and therfor vertues worchen in hym.Verse 3For Heroude hadde holde Joon, and bounde hym, and puttide hym `in to prisoun for Herodias, the wijf of his brothir.Verse 4For Joon seide to him, It is not leueful to thee to haue hir.Verse 5And he willynge to sle hym, dredde the puple; for thei hadden hym as a prophete.Verse 6But in the dai of Heroudis birthe, the douytir of Herodias daunside in the myddil, and pleside Heroude.Verse 7Wherfor with an ooth he bihiyte to yyue to hir, what euere thing she hadde axid of hym.Verse 8And she bifor warned of hir modir, seide, Yif thou to me here the heed of Joon Baptist in a disch.Verse 9And the kyng was sorewful, but for the ooth, and for hem that saten to gidere at the mete, he comaundide to be youun.Verse 10And he sente, and bihedide Joon in the prisoun.Verse 11And his heed was brouyt in a dische, and it was youun to the damysel, and she bar it to hir modir.Verse 12And hise disciplis camen, and token his bodi, and birieden it; and thei camen, and tolden to Jhesu.Verse 13And whanne Jhesus hadde herd this thing, he wente fro thennus in a boot, in to desert place bisides. And whanne the puple hadde herd, thei folewiden hym on her feet fro citees.Verse 14And Jhesus yede out, and sai a greet puple, and hadde reuthe on hem, and heelide the sike men of hem.Verse 15But whanne the euentid was com, hise disciplis camen to him, and seiden, The place is desert, and the tyme is now passid; lat the puple go in to townes, to bye hem mete.Verse 16Jhesus seide to hem, Thei han not nede to go; yyue ye hem sumwhat to ete.Verse 17Thei answeriden, We han not heere, but fyue looues and twei fischis.Verse 18And he seide to hem, Brynge ye hem hidur to me.Verse 19And whanne he hadde comaundid the puple to sitte to meete on the heye, he took fyue looues and twei fischis, and he bihelde in to heuene, and blesside, and brak, and yaf to hise disciplis; and the disciplis yauen to the puple.Verse 20And alle eten, and weren fulfillid. And thei tooken the relifs of brokun gobetis, twelue cofynes ful.Verse 21And the noumbre of men that eten was fyue thousynde of men, outakun wymmen and lytle children.Verse 22And anoon Jhesus compellide the disciplis to go vp in to a boot, and go bifor hym ouer the see, while he lefte the puple.Verse 23And whanne the puple was left, he stiede aloone in to an hil for to preie. But whanne the euenyng was come, he was there aloone.Verse 24And the boot in the myddel of the see was schoggid with wawis, for the wynd was contrarie to hem.Verse 25But in the fourthe wakyng of the niyt, he cam to hem walkynge aboue the see.Verse 26And thei, seynge hym walking on the see, weren disturblid, and seiden, That it is a fantum; and for drede thei crieden.Verse 27And anoon Jhesus spac to hem, and seide, Haue ye trust, Y am; nyle ye drede.Verse 28And Petre answeride, and seide, Lord, if thou art, comaunde me to come to thee on the watris.Verse 29And he seide, Come thou. And Petre yede doun fro the boot, and walkide on the watris to come to Jhesu.Verse 30But he siy the wynd strong, and was aferde; and whanne he bigan to drenche, he criede, and seide, Lord, make me saaf.Verse 31And anoon Jhesus helde forth his hoond, and took Petre, and seide to hym, Thou of litil feith, whi hast thou doutid?Verse 32And whanne he hadde stied in to the boot, the wynd ceessid.Verse 33And thei, that weren in the boot, camen, and worschipiden hym, and seiden, Verili, thou art Goddis sone.Verse 34And whanne thei hadden passid ouer the see, thei camen in to the loond of Genesar.Verse 35And whanne men of that place hadden knowe hym, thei senten in to al that cuntre; and thei brouyten to hym alle that hadden siknesse.Verse 36And thei preieden hym, that thei schulden touche the hemme of his clothing; and who euere touchiden weren maad saaf.