Matthew 11 — W88
11Verse 1And it was doon, whanne Jhesus hadde endid, he comaundide to hise twelue disciplis, and passide fro thennus to teche and preche in the citees of hem.Verse 2But whanne Joon in boondis hadde herd the werkis of Crist, he sente tweyne of hise disciplis,Verse 3and seide to him, `Art thou he that schal come, or we abiden another?Verse 4And Jhesus answeride, and seide `to hem, Go ye, and telle ayen to Joon tho thingis that ye han herd and seyn.Verse 5Blynde men seen, crokid men goon, meselis ben maad clene, deefe men heren, deed men rysen ayen, pore men ben takun to `prechyng of the gospel.Verse 6And he is blessid, that shal not be sclaundrid in me.Verse 7And whanne thei weren goon awei, Jhesus bigan to seie of Joon to the puple, What thing wenten ye out in to desert to se? a reed wawed with the wynd?Verse 8Or what thing wenten ye out to see? a man clothid with softe clothis? Lo! thei that ben clothid with softe clothis ben in the housis of kyngis.Verse 9But what thing wenten ye out to se? a prophete? Yhe, Y seie to you, and more than a prophete.Verse 10For this is he, of whom it is writun, Lo! Y sende myn aungel bifor thi face, that shal make redi thi weye bifor thee.Verse 11Treuli Y seie to you, ther roos noon more than Joon Baptist among the children of wymmen; but he that is lesse in the kyngdom of heuenes, is more than he.Verse 12And fro the daies of Joon Baptist til now the kyngdom of heuenes suffrith violence, and violent men rauyschen it.Verse 13For alle prophetis and the lawe `til to Joon prophecieden; and if ye wolen resseyue,Verse 14he is Elie that is to come.Verse 15He that hath eris of heryng, here he.Verse 16But to whom schal Y gesse this generacioun lijk? It is lijk to children sittynge in chepyng, that crien to her peeris,Verse 17and seien, We han songun to you, and ye han not daunsid; we han morned to you, and ye han not weilid.Verse 18For Joon cam nether etynge ne drynkynge, and thei seien, He hath a deuel.Verse 19The sone of man cam etynge and drynkynge, and thei seien, Lo! a man a glotoun, and a drinkere of wijne, and a freend of pupplicans and of synful men. And wisdom is iustified of her sones.Verse 20Thanne Jhesus bigan to seye repreef to citees, in whiche ful manye vertues of him weren doon, for thei diden not penaunce.Verse 21Wo to thee! Corosaym, woo to thee! Bethsaida; for if the vertues that ben doon in you hadden be doon in Tyre and Sidon, sumtyme thei hadden don penaunce in heyre and aische.Verse 22Netheles Y seie to you, it schal be lesse peyne to Tire and Sidon in the dai of doom, than to you.Verse 23And thou, Cafarnaum, whethir thou schalt be arerid vp in to heuene? Thou shalt go doun in to helle. For if the vertues that ben don in thee, hadden be don in Sodom, perauenture thei schulden haue dwellid `in to this dai.Verse 24Netheles Y seie to you, that to the lond of Sodom it schal be `lesse peyne in the dai of doom, than to thee.Verse 25In thilke tyme Jhesus answeride, and seide, Y knowleche to thee, fadir, lord of heuene and of erthe, for thou hast hid these thingis fro wijse men, and redi, and hast schewid hem to litle children;Verse 26so, fadir, for so it was plesynge tofore thee.Verse 27Alle thingis ben youune to me of my fadir; and no man knewe the sone, but the fadir, nethir ony man knewe the fadir, but the sone, and to whom the sone wolde schewe.Verse 28Alle ye that traueilen, and ben chargid, come to me, and Y schal fulfille you.Verse 29Take ye my yok on you, and lerne ye of me, for Y am mylde and meke in herte; and ye schulen fynde reste to youre soulis.Verse 30`For my yok is softe, and my charge liyt.