Matthew 10 — W88
10Verse 1And whanne his twelue disciplis weren clepid togidere, he yaf to hem powere of vnclene spiritis, to caste hem out of men, and to heele eueri langour, and sijknesse.Verse 2And these ben the names of the twelue apostlis; the firste, Symount, that is clepid Petre, and Andrew, his brothir; James of Zebede, and Joon, his brothir; Filip, and Bartholomeu;Verse 3Thomas, and Matheu, pupplican; and James Alfey, and Tadee;Verse 4Symount Chananee, and Judas Scarioth, that bitrayede Crist.Verse 5Jhesus sente these twelue, and comaundide hem, and seide, Go ye not `in to the weie of hethene men, and entre ye not in to the citees of Samaritans;Verse 6but rather go ye to the scheep of the hous of Israel, that han perischid.Verse 7And go ye, and preche ye, and seie, that the kyngdam of heuenes shal neiye;Verse 8heele ye sike men, reise ye deede men, clense ye mesels, caste ye out deuelis; freeli ye han takun, freli yyue ye.Verse 9Nyle ye welde gold, nether siluer, ne money in youre girdlis, not a scrippe in the weie,Verse 10nether twei cootis, nethir shoon, nether a yerde; for a werkman is worthi his mete.Verse 11In to what euere citee or castel ye schulen entre, axe ye who therynne is worthi, and there dwelle ye, til ye go out.Verse 12And whanne ye goon in to an hous, `grete ye it, and seyn, Pees to this hous.Verse 13And if thilk hous be worthi, youre pees schal come on it; but if that hous be not worthi, youre pees schal turne ayen to you.Verse 14And who euere resseyueth not you, nethir herith youre wordis, go ye fro that hous or citee, and sprenge of the dust of youre feet.Verse 15Treuly Y seie to you, it shal be more suffrable to the loond of men of Sodom and of Gommor in the dai of iugement, than to thilke citee.Verse 16Lo! Y sende you as scheep in the myddil of wolues; therfor be ye sliy as serpentis, and symple as dowues.Verse 17But be ye war of men, for thei schulen take you in counseilis, and thei schulen bete you in her synagogis;Verse 18and to meyris, or presidentis, and to kyngis, ye schulen be lad for me, in witnessyng to hem, and to the hethen men.Verse 19But whanne thei take you, nyle ye thenke, hou or what thing ye schulen speke, for it shal be youun `to you in that our, what ye schulen speke;Verse 20for it ben not ye that speken, but the spirit of youre fadir, that spekith in you.Verse 21`And the brother shal take the brother in to deeth, and the fader the sone, and sones schulen rise ayens fadir and modir, and schulen turmente hem bi deeth.Verse 22And ye schulen be in hate to alle men for my name; but he that shall dwelle stille in to the ende, shal be saaf.Verse 23And whanne thei pursuen you in this citee, fle ye in to anothir. Treuli Y seie to you, ye schulen not ende the citees of Israel, to for that mannus sone come.Verse 24The disciple is not aboue the maistir, ne the seruaunt aboue hys lord;Verse 25it is ynowy to the disciple, that he be as his maistir, and to the seruaunt as his lord. If thei han clepid the hosebonde man Belsabub, hou myche more his houshold meyne?Verse 26Therfor drede ye not hem; for no thing is hid, that schal not be shewid; and no thing is priuey, that schal not be wist.Verse 27That thing that Y seie to you in derknessis, seie ye in the liyt; and preche ye on housis, that thing that ye heeren in the ere.Verse 28And nyle ye drede hem that sleen the bodi; for thei moun not sle the soule; but rather drede ye hym, that mai lese bothe soule and bodi in to helle.Verse 29Whether twei sparewis ben not seeld for an halpeny? and oon of hem shal not falle on the erthe with outen youre fadir.Verse 30`And alle the heeris of youre heed ben noumbrid.Verse 31Therfor nyle ye drede; ye ben betere than many sparewis.Verse 32Therfor euery man that schal knouleche me bifore men, Y schal knouleche hym bifor my fadir that is in heuenes.Verse 33But he that shal denye me bifor men, and I shal denye him bifor my fadir that is in heuenes.Verse 34Nile ye deme, that Y cam to sende pees in to erthe; Y cam not to sende pees, but swerd.Verse 35For Y cam to departe a man ayens his fadir, and the douytir ayens hir modir, and the sones wijf ayens the housbondis modir;Verse 36and the enemyes of a man ben `thei, that ben homeli with him.Verse 37He that loueth fadir or modir more than me, is not worthi to me. And he that loueth sone or douyter ouer me, is not worthi to me.Verse 38And he that takith not his croos, and sueth me, is not worthi to me.Verse 39He that fyndith his lijf, shal lose it; and he that lesith his lijf for me, shal fynde it.Verse 40He that resseyueth you, resseyueth me; and he that resseyueth me, resseyueth hym that sente me.Verse 41He that resseyueth a prophete in the name of a prophete, shal take the mede of a prophete. And he that resseyueth a iust man in the name of a iust man, schal take the mede of a iust man.Verse 42And who euer yyueth drynke to oon of these leeste a cuppe of coolde watir oonli in the name of a disciple, treuli Y seie to you, he shal not leese his mede.