Exodus 39 — W88
39Verse 1Forsothe of iacynt, and purpur, vermyloun, and bijs, he made clothis, in whiche Aaron was clothid, whanne he mynystride in hooli thingis, as the Lord comaundide to Moises.Verse 2Therfor he made the `cloth on the schuldris of gold, iacynt, and purpur, and of reed selk twies died,Verse 3and of bijs foldid ayen, bi werk of broiderie; also he kittide thinne goldun platis, and made thinne in to threedis, that tho moun be foldid ayen, with the warp of the formere colouris;Verse 4and he made tweyne hemmes couplid to hem silf to gidere, in euer either side of the endis; and `he made a girdil of the same colouris,Verse 5as the Lord comaundide to Moises.Verse 6And he made redi twei `stonys of onychyn, boundun and closid in gold, and grauun bi the craft of worchere in iemmys, with the names of the sones of Israel; sixe names in o stoon, and sixe in the tother stoon, bi the ordre of her birthe.Verse 7And he settide tho stoonus in the sidis of the `clooth on the schuldris, in to a memorial of the sones of Israel, as the Lord comaundide to Moises.Verse 8He made also the racional, `by werk of broiderie, bi the werk of the `cloth on the schuldris, of gold, iacynt, purpur, and reed selk twies died, and of biis foldid ayen; he made the racional foure cornerid,Verse 9double, of the mesure of foure fyngris.Verse 10And settide thereynne foure ordris of iemmes; in the firste ordre was sardius, topazius, smaragdus; in the secounde was carbuncle,Verse 11safir, iaspis;Verse 12in the thridde ordre was ligurie, achates, ametiste;Verse 13in the fourthe ordre was crisolite, onochyn, and berille, cumpassid and enclosid with gold, bi her ordris.Verse 14And tho twelue stonys weren grauyn with twelue names, of the lynage of Israel, alle stonys bi hem silf, bi the names of alle lynagis bi hem silf.Verse 15Thei maden also in the racional litle chaynes, cleuynge to hem silf togidre,Verse 16of pureste gold, and tweyne hokys, and so many ryngis of gold. Forsothe thei settiden the ryngis on euer either side of the racional,Verse 17of whiche ryngis twei goldun chaynes hangiden, whiche thei settiden in the hokis, that stonden forth in the corneris of the `cloth on the schuldris.Verse 18These acordiden so to hem silf, bothe bifore and bihynde, that the `cloth on the schuldris, and the racional,Verse 19weren knyt togidere, fastned to the girdil, and couplid ful strongli with ryngis, whiche ryngis a lace of iacynt ioynede togidere, lest tho weren loose, and `fletiden doun, and weren moued ech from other, as the Lord comaundide to Moises.Verse 20Thei maden also `a coote on the schuldris, al of iacynt;Verse 21and the hood in the hiyere part, aboute the myddis, and a wouun hemme, bi the cumpas of the hood;Verse 22forsothe bynethe at the feet piyn applis of iacynt, and purpur, and vermyloun, and biys foldid ayen;Verse 23and litle bellis of pureste gold, whiche thei settiden bitwixe pum garnadis, in the `lowest part of the coote, bi cumpas;Verse 24a goldun litle belle, and a piyn apple; with whiche the bischop yede ourned, whanne he `was set in seruyce, as the Lord comaundide to Moises.Verse 25Thei maden also cootis of bijs, bi wouun werk, to Aaron and to hise sones,Verse 26and mytres with smale corouns of biys,Verse 27and lynnun clothis of bijs;Verse 28forsothe a girdil of bijs foldid ayen, of iacynt, purpur, and vermyloun, departid bi craft of broyderie, as the Lord comaundide to Moises.Verse 29Thei maden also a plate of hooli worschipyng, of pureste gold, and thei writeden therynne bi werk of a worchere in iemmes, The hooli of the Lord.Verse 30And thei bounden it with the mytre bi a lace of iacynt, as the Lord comaundide to Moises.Verse 31Therfor al the werk of the tabernacle, and the hilyng of the witnessyng, was parformed; and the sones of Israel diden alle thingis whiche the Lord comaundide to Moises.Verse 32And thei offeriden the tabernacle, and the roof, and al the purtenaunce, ryngis, tablis, barris, pileris, and foundementis;Verse 33the hilyng of `skynnes of rammes, maad reed, and another hilyng of skynnys of iacynt;Verse 34the veil, the arke, barris, propiciatorie;Verse 35the boord with vessels, and with the looues of settyng forth;Verse 36the candilstike, lanternes, and the purtenauncis of tho, with oile;Verse 37the goldun auter, and oynement, and encense of swete smellynge spiceries;Verse 38and the tente in the entryng of the tabernacle;Verse 39the brasun auter, gridile, barris, and alle vessels therof; the `greet waischyng vessel, with his foundement; the tentis of the greet street, and the pilers with her foundementis;Verse 40the tente in the entring of the greet street, and the coordis, and stakis therof. No thing of the vessels failide, that weren comaundid to be maad in to the seruyce of the tabernacle, and in to the roof of the boond of pees.Verse 41Also the sones of Israel offriden the clothis whiche the prestis, that is, Aaron and hise sones, vsen in the seyntuarie,Verse 42as the Lord comaundide.Verse 43And aftir that Moises siy alle tho thingis fillid, he blesside hem.