Exodus 1 — W88
1Verse 1These ben the names of the sones of Israel, that entriden into Egipt with Jacob; alle entriden with her housis;Verse 2Ruben, Symeon,Verse 3Leuy, Judas, Isachar, Zabulon, and Benjamin,Verse 4Dan, and Neptalim, Gad, and Aser.Verse 5Therfor alle the soules of hem that yeden out of `the hipe of Jacob weren seuenti and fyue.Verse 6Forsothe Joseph was in Egipt; and whanne he was deed, and alle hise brithren, and al his kynrede,Verse 7the sones of Israel encreessiden, and weren multiplied as buriounnyng, and thei weren maad strong greetli, and filliden the lond.Verse 8A newe kyng, that knewe not Joseph, roos in the meene tyme on Egipt, and seide to his puple, Lo!Verse 9the puple of the sones of Israel is myche, and strongere than we;Verse 10come ye, wiseli oppresse we it, lest perauenture it be multiplied; and lest, if batel risith ayens vs, it be addid to oure enemyes, and go out of the lond, whanne we ben ouercomun.Verse 11And so he made maistris of werkis souereyns to hem, that thei schulden turmente hem with chargis. And thei maden citees of tabernaclis to Farao, Fiton, and Ramesses.Verse 12And bi hou myche thei oppressiden hem, bi so myche thei weren multiplied, and encreessiden more.Verse 13And Egipcians hatiden the sones of Israel, and turmentiden, and scorneden hem;Verse 14and brouyten her lijf to bitternesse bi hard werkis of cley and to tijl stoon, and bi al seruage, bi which thei weren oppressid in the werkis of erthe.Verse 15Forsothe the kyng of Egipt seide to the mydwyues of Ebrews, of whiche oon was clepid Sefora, the tother Fua;Verse 16and he commaundide to hem, Whanne ye schulen do the office of medewyues to Ebrew wymmen, and the tyme of childberyng schal come, if it is a knaue child, sle ye him; if it is a womman, kepe ye.Verse 17Forsothe the medewyues dredden God, and diden not bi the comaundement of the kyng of Egipt, but kepten knaue children.Verse 18To whiche clepid to hym the kyng seide, What is this thing which ye wolden do, that ye wolden kepe the children?Verse 19Whiche answeriden, Ebrew wymmen ben not as the wymmen of Egipt, for thei han kunnyng of the craft of medewijf, and childen bifore that we comen to hem.Verse 20Therfor God dide wel to medewyues; and the puple encreesside, and was coumfortid greetli.Verse 21And for the mydewyues dredden God, he bildide `housis to hem.Verse 22Therfor Farao comaundide al his puple, and seide, What euer thing of male kynde is borun to Ebrewis, `caste ye into the flood; what euer thing of wymmen kynde, kepe ye.