Numbers 17 — W88
17Verse 1And the Lord spak to Moises, `and seide, Speke thou to the sones of Israel,Verse 2and take thou yerdis, bi her kynredis, bi ech kynrede o yeerde, take thou of alle the princes of the lynagis twelue yerdis; and thou schalt write the name of each lynage aboue his yerde;Verse 3forsothe the name of Aaron schal be in the lynage of Leuy, and o yerde schal conteyne alle the meynees of hem.Verse 4And thou schalt putte tho yerdis in the tabernacle of boond of pees, bifor the witnessyng, where Y schal speke to thee; the yerde of hym schal buriowne, whom Y schal chese of hem;Verse 5and Y schal refreyne fro me the playnyngis of the sones of Israel, bi whiche thei grutchen ayens you.Verse 6And Moyses spak to the sones of Israel; and alle princes yauen to hym yerdis, bi alle lynagis; and the yerdis weren twelue, without the yerde of Aaron.Verse 7And whanne Moises hadde put tho yerdis bifor the Lord, in the tabernacle of witnessyng, he yede ayen in the day suynge,Verse 8and founde that the yerde of Aaron, `in the hows of Leuy, buriounnede; and whanne knoppis weren greet, the blossoms `hadden broke out, whiche weren alargid in leeuys, and weren fourmed in to alemaundis.Verse 9Therfor Moyses brouyte forth alle the yerdis fro the siyt of the Lord to al the sones of Israel; and thei sien, and resseyueden ech his yerde.Verse 10And the Lord seide to Moises, Bere ayen the yerde of Aaron in to the tabernacle of witnessyng, that it be kept there in to `the signe of the rebel sones of Israel, and that her `playntis reste fro me, lest thei dien.Verse 11And Moises dide, as the Lord comaundide.Verse 12Forsothe the sones of Israel seiden to Moises, Lo! we ben wastid, alle we perischiden;Verse 13who euer neiyeth to the tabernacle of the Lord, he dieth; whethir+we schulen be doon awei alle `til to deeth?