Numbers 13 — W88
13Verse 1And the puple yede forth fro Asseroth, whanne the tentis weren set in the deseert of Pharan.Verse 2And there the Lord spak to Moises,Verse 3and seide, Sende thou men that schulen biholde the lond of Canaan, which Y schal yyue to the sones of Israel, of ech lynage o man of the princes.Verse 4Moises dide that that the Lord comaundide,+and sente fro the deseert of Pharan princes, men of whiche these ben the names.Verse 5Of the lynage of Ruben, Semmya, the sone of Zectur.Verse 6Of the lynage of Symeon, Saphat, the sone of Hury.Verse 7Of the lynage of Juda, Caleph, the sone of Jephone.Verse 8Of the lynage of Isachar, Igal, the sone of Joseph.Verse 9Of the lynage of Effraym, Osee, the sone of Nun.Verse 10Of the lynage of Beniamyn, Phalti, the sone of Raphu.Verse 11Of the lynage of Zabulon, Gediel, the sone of Sodi.Verse 12Of the lynage of Joseph, of the gouernaunce of Manasses, Gaddi, the sone of Susy.Verse 13Of the lynage of Dan, Amyel, the sone of Gemalli.Verse 14Of the lynage of Aser, Sur, the sone of Mychael.Verse 15Of the lynage of Neptalym, Nabdi, the sone of Napsi.Verse 16Of the lynage of Gad, Guel, the sone of Machi.Verse 17These ben the names of men, which Moises sente to biholde the lond of Canaan; and he clepide Osee, the sone of Nun, Josue.Verse 18Therfor Moises sente hem to biholde the lond of Canaan, and seide to hem, `Stie ye bi the south coost; and whanne ye comen to the hillis,Verse 19biholde ye the lond, what maner lond it is; and biholde ye the puple which is the dwellere therof, whether it is strong, ethir feble, `whether thei ben fewe in noumbre, ether manye;Verse 20whether that lond is good, ethir yuel; what maner citees ben, wallid, ether without wallis;Verse 21whether the lond is fat, ether bareyn, `whether it is ful of woodis, ethir without trees. Be ye coumfortid, and `brynge ye to vs of the fruytis of that lond. Sotheli the tyme was, whanne grapis first ripe myyten be etun thanne.Verse 22And whanne thei hadden stied, thei aspieden the lond, fro the deseert of Syn `til to Rohob, as men entryth to Emath.Verse 23And thei stieden to the south, and camen in to Ebron,+where Achyman, and Sisai, and Tholmai, the sones of Enach, weren; for Hebron was maad bi seuen yeer bifor Thamnys, the citee of Egipt.Verse 24And thei yeden til to the stronde of clustre, and kittiden doun a sioun with his grape, which twei men baren in a barre; also thei token of pumgarnadis, and of the figis of that place which is clepid Nehelescol,Verse 25that is, the stronde of grape, for the sones of Israel baren a clustre fro thennus.Verse 26And the aspieris of the lond, whanne thei hadden cumpassid al the cuntrey, after fourti daies camen to Moises and Aaron,Verse 27and to al the cumpany of the sones of Israel, in to the deseert of Pharan which is in Cades. And `the aspieris spaken to hem, and schewiden the fruytis of the lond to al the multitude, and telden,Verse 28and seiden, We camen to the lond, to which thou sentest vs, which lond treuli flowith with mylk and hony, as it may be knowun bi these fruytis;Verse 29but it hath strongeste inhabiteris, and grete cytees, and wallid; we sien there the kynrede of Anachym; Amalech dwellith in the south;Verse 30Ethei, and Jebusei, and Amorey dwellen in the hilli placis; forsothe Cananey dwellith bisidis the see, and bisidis the floodis of Jordan.Verse 31Among thes thingis Caleph peeside the grutchyng of the puple, that was maad ayens Moises, and seide, `Stie we, and welde we the lond, for we moun gete it.Verse 32Forsothe other aspieris, that weren with hym, seiden, We moun not stie to this puple, for it is strongere than we.Verse 33And thei deprauyden the lond which thei hadden biholde, anentis the sones of Israel, and seiden, The lond which we cumpassiden deuourith hise dwelleris; the puple which we bihelden is of large stature; there we syen summe wondris ayens kynde, of the sones of Enach, of the kynde of geauntis, to whiche we weren comparisound, and weren seien as locustis.