Numbers 10 — W88
10Verse 1And the Lord spak to Moises, and seide,Verse 2Make to thee twei siluerne trumpis betun out with hameris, bi whiche thou maist clepe togidere the multitude, whanne the tentis schulen be moued.Verse 3And whanne thou schalt sowne with trumpis, al the cumpeny schal be gaderid to thee at the dore of the tabernacle of the boond of pees.Verse 4If thou schalt sowne onys,+the princes and the heedis of the multitude of Israel schulen come to thee;Verse 5but if a lengere and departid trumpyng schal sowne, thei that ben at the eest coost schulen moue tentis first.Verse 6Forsothe in the secounde sown and lijk noise of the trumpe thei that dwellen at the south schulen reise tentis; and bi this maner othere men schulen do, whanne the trumpis schulen sowne in to goyng forth.Verse 7Forsothe whanne the puple schal be gederid to gidere, symple cry of trumpis schal be, and tho schulen not sowne departyngli.Verse 8The sones of Aaron preest schulen sowne with trumpis, and this schal be a lawful thing euerlastynge in youre generaciouns.Verse 9If ye schulen go out of youre lond to batel ayens enemyes that fiyten ayens you, ye schulen crye with trumpis sownynge, and the bithenkyng of you schal be bifor youre Lord God, that ye be delyuered fro the hondis of youre enemyes.Verse 10If ony tyme ye schulen haue a feeste, and halidaies, and calendis,+ye schulen synge in trumpis on brent sacrifices and pesible sacrifices, that tho be to you in to remembryng of youre God; Y am youre Lord God.Verse 11In the secounde yeer, in the secounde monethe, in the twentithe dai of the monethe, the cloude was reisid fro the tabernacle of boond of pees.Verse 12And the sones of Israel yeden forth bi her cumpenyes fro deseert of Synay; and the cloude restide in the wildirnesse of Faran.Verse 13And the sones of Juda bi her cumpenyes, of whiche the prince was Naason, the sone of Amynadab, moueden first tentis,Verse 14bi the Lordis comaundement maad in the hond of Moises.Verse 15In the lynage of the sones of Ysacar the prince was Nathanael, the sone of Suar.Verse 16In the lynage of Sabulon the prince was Heliab, the sone of Helon.Verse 17And the tabernacle was takun doun, which the sones of Gerson and of Merary baren, and `yeden out.Verse 18And the sones of Ruben yeden forth bi her cumpenyes and ordre, of whiche the prince was Helisur, the sone of Sedeur.Verse 19Forsothe in the lynage of the sones of Symeon the prince was Salamyel, the sone of Surisaddai.Verse 20Sotheli in the lynage of Gad the prince was Helisaphath, the sone of Duel.Verse 21And the sones of Caath yeden forth, and baren the seyntuarie; so longe the tabernacle was borun, til thei camen to the place of reisyng+therof.Verse 22Also the sones of Effraym, bi her cumpanyes, moueden tentis, in whos oost the prince was Elisama, the sone of Amyud.Verse 23Forsothe in the lynage of the sones of Manasses the prince was Gamaliel, the sone of Phadussur.Verse 24And in the lynage of Beniamyn the duk was Abidan, the sone of Gedeon.Verse 25The sones of Dan, bi her cumpenyes, yeden forth the laste of alle tentis,+in whos oost the prince was Aizer, the sone of Amysaddai.Verse 26Sotheli in the lynage of the sones of Aser the prince was Phegiel, the sone of Ochran.Verse 27And in the lynage of the sones of Neptalym the prince was Haira, the sone of Henan.Verse 28These ben the castels and the goinges forth of the sones of Israel, bi her cumpenyes, whanne thei yeden out.Verse 29And Moises seide to Heliab, the sone of Raguel, of Madian, his alie `ethir fadir of his wijf, We goon forth to the place which the Lord schal yyue to vs; come thou with vs, that we do wel to thee, for the Lord bihiyte goode thingis to Israel.Verse 30To whom he answeride, Y schal not go with thee, but Y schal turne ayen in to my lond, in which Y was borun.Verse 31And Moises seide, Nyle thou forsake vs, for thou knowist in whiche places we owen to sette tentis, and thou schalt be oure ledere;Verse 32and whanne thou schalt come with vs, what euer thing schal be the beste of the richessis whiche the Lord schal yyue to vs, we schulen yyue to thee.Verse 33And therfor thei yeden forth fro the hil of the Lord the weie of thre daies; and the arke of boond of pees of the Lord yede bifor hem, bi thre daies, and purueyde the place of tentis.Verse 34And the cloude of the Lord was on hem bi day, whanne thei yeden.Verse 35And whanne the arke was reisid, Moises seide, Ryse thou, Lord, and thin enemyes be scaterid, and thei that haten thee, fle fro thi face;Verse 36forsothe whanne the arke was put doun, he seide, Lord, turne ayen to the multitude of the oost of Israel.