Matthew 8 — W88
8Verse 1But whanne Jhesus was come doun fro the hil, mych puple suede hym.Verse 2And loo! a leprouse man cam, and worschipide hym, and seide, Lord, if thou wolt, thou maist make me clene.Verse 3And Jhesus helde forth the hoond, and touchide hym, and seide, Y wole, be thou maad cleene. And anoon the lepre of him was clensid.Verse 4And Jhesus seide to hym, Se, seie thou to no man; but go, shewe thee to the prestis, and offre the yift that Moyses comaundide, in witnessyng to hem.Verse 5And whanne he hadde entrid in to Cafarnaum, `the centurien neiyede to him, and preiede him,Verse 6and seide, Lord, my childe lijth in the hous sijk on the palesie, and is yuel turmentid.Verse 7And Jhesus seide to him, Y schal come, and schal heele him.Verse 8And the centurien answeride, and seide to hym, Lord, Y am not worthi, that thou entre vndur my roof; but oonli seie thou bi word, and my childe shal be heelid.Verse 9For whi Y am a man ordeyned vndur power, and haue knyytis vndir me; and Y seie to this, Go, and he goith; and to another, Come, and he cometh; and to my seruaunt, Do this, and he doith it.Verse 10And Jhesus herde these thingis, and wondride, and seide to men `that sueden him, Treuli Y seie to you, Y foond not so greet feith in Israel.Verse 11And Y seie to you, that many schulen come fro the eest and the west, and schulen reste with Abraham and Ysaac and Jacob in the kyngdom of heuenes;Verse 12but the sones of the rewme schulen be cast out in to vtmer derknessis; there schal be wepyng, and grynting of teeth.Verse 13And Jhesus seide to the centurioun, Go, and as thou hast bileuyd, be it doon to thee. And the child was heelid fro that hour.Verse 14And whanne Jhesus was comun in to the hous of Symount Petre, he say his wyues modir liggynge, and shakun with feueris.Verse 15And he touchide hir hoond, and the feuer lefte hir; and she roos, and seruede hem.Verse 16And whanne it was euen, thei brouyten to hym manye that hadden deuelis, and he castide out spiritis bi word, and heelide alle that weren yuel at ese;Verse 17that it were fulfillid, that was seid by Ysaie, the profete, seiynge, He took oure infirmytees, and bar oure siknessis.Verse 18And Jhesus say myche puple aboute him, and bade hise disciplis go ouer the watir.Verse 19And a scribe neiyede, and seide to hym, Maistir, Y shal sue thee, whidir euer thou schalt go.Verse 20And Jhesus seide to hym, Foxis han dennes, and briddis of heuene han nestis, but mannus sone hath not where `he schal reste his heed.Verse 21Anothir of his disciplis seide to him, Lord, suffre me to go first, and birie my fader.Verse 22But Jhesus seide to hym, Sue thou me, and lete deed men birie her deede men.Verse 23And whanne he was goon vp in to a litil schip, his disciplis sueden hym.Verse 24And loo! a greet stiring was maad in the see, so that the schip was hilid with wawes; but he slepte.Verse 25And hise disciplis camen to hym, and reysiden hym, and seiden, Lord, saue vs; we perischen.Verse 26And Jhesus seide to hem, What ben ye of litil feith agaste? Thanne he roos, and comaundide to the wyndis and the see, and a greet pesibilnesse was maad.Verse 27And men wondriden, and seiden, What maner man is he this, for the wyndis and the see obeischen to him?Verse 28And whanne Jhesus was comun ouer the watir in to the cuntre of men of Gerasa, twey men metten hym, that hadden deuelis, and camen out of graues, ful woode, so that noo man myyte go bi that weie.Verse 29And lo! thei crieden, and seiden, What to vs and to thee, Jhesu, the sone of God? `art thou comun hidir bifore the tyme to turmente vs?Verse 30And not fer fro hem was a flocke of many swyne lesewynge.Verse 31And the deuelis preyeden hym, and seiden, If thou castist out vs fro hennes, sende vs in to the droue of swyne.Verse 32And he seide to hem, Go ye. And thei yeden out, and wenten in to the swyne; and loo! in a greet bire al the droue wente heedlyng in to the see, and thei weren deed in the watris.Verse 33And the hirdis fledden awey, and camen in to the citee, and telden alle these thingis, and of hem that hadden the feendis.Verse 34And lo! al the citee wente out ayens Jhesu; and whanne thei hadden seyn hym, thei preieden, that he wolde passe fro her coostis.