Matthew 25 — W88
25Verse 1Thanne the kyngdoom of heuenes schal be lijk to ten virgyns, whiche token her laumpis, and wenten out ayens the hosebonde and the wijf;Verse 2and fyue of hem weren foolis, and fyue prudent.Verse 3But the fyue foolis token her laumpis, and token not oile with hem;Verse 4but the prudent token oile in her vessels with the laumpis.Verse 5And whilis the hosebonde tariede, alle thei nappiden and slepten.Verse 6But at mydnyyt a cryy was maad, Lo! the spouse cometh, go ye oute to mete with him.Verse 7Thanne alle tho virgyns risen vp, and araieden her laumpis.Verse 8And the foolis seiden to the wise, Yyue ye to vs of youre oile, for oure laumpis ben quenchid.Verse 9The prudent answeriden, and seiden, Lest perauenture it suffice not to vs and to you, go ye rather to men that sellen, and bie to you.Verse 10And while thei wenten for to bie, the spouse cam; and tho that weren redi, entreden with him to the weddyngis; and the yate was schit.Verse 11And at the last the othere virgyns camen, and seiden, Lord, lord, opene to vs.Verse 12And he answeride, and seide, Treuli Y seie to you, Y knowe you not.Verse 13Therfor wake ye, for ye witen not the dai ne the our.Verse 14For as a man that goith in pilgrimage, clepide hise seruauntis, and bitook to hem hise goodis;Verse 15and to oon he yaf fyue talentis, and to another tweyne, and to another oon, to ech after his owne vertu; and wente forth anoon.Verse 16And he that hadde fyue besauntis, wente forth, and wrouyte in hem, and wan othere fyue.Verse 17Also and he that hadde takun tweyne, wan othere tweyne.Verse 18But he that hadde takun oon, yede forth, and dalf in to the erthe, and hidde the money of his lord.Verse 19But after long tyme, the lord of tho seruauntis cam, and rekenede with hem.Verse 20And he that hadde takun fyue besauntis, cam, and brouyte othere fyue, and seide, Lord, thou bytokist to me fyue besauntis, loo! Y haue getun aboue fyue othere.Verse 21His lord seide to hym, Wel be thou, good seruaunt and feithful; for on fewe thingis thou hast be trewe, Y schal ordeyne thee on manye thingis; entre thou in to the ioye of thi lord.Verse 22And he that hadde takun twey talentis, cam, and seide, Lord, thou bitokist to me twey besauntis; loo!Verse 23Y haue wonnen ouer othir tweyne. His lord seide to him, Wel be thou, good seruaunt and trewe; for on fewe thingis thou hast be trewe, Y schal ordeyne thee on many thingis; entre thou in to the ioie of thi lord.Verse 24But he that hadde takun o besaunt, cam, and seide, Lord, Y woot that thou art an hard man; thou repist where thou hast not sowe, and thou gederist togidere where thou hast not spred abrood;Verse 25and Y dredynge wente, and hidde thi besaunt in the erthe; lo! thou hast that that is thin.Verse 26His lord answeride, and seide to hym, Yuel seruaunt and slowe, wistist thou that Y repe where Y sewe not, and gadir to gidere where Y spredde not abrood?Verse 27Therfor it bihofte thee to bitake my money to chaungeris, that whanne Y cam, Y schulde resseyue that that is myn with vsuris.Verse 28Therfor take awei fro hym the besaunt, and yyue ye to hym that hath ten besauntis.Verse 29For to euery man that hath me schal yyue, and he schal encreese; but fro hym that hath not, also that that hym semeth to haue, schal be taken awey fro him.Verse 30And caste ye out the vnprofitable seruaunt in to vtmer derknessis; ther schal be wepyng, and gryntyng of teeth.Verse 31Whanne mannus sone schal come in his maieste, and alle hise aungels with hym, thanne he schal sitte on the sege of his maieste;Verse 32and alle folkis schulen be gaderid bifor hym,Verse 33and he schal departe hem atwynne, as a scheeperde departith scheep from kidis; and he schal sette the scheep on his riythalf, and the kidis on the lefthalf.Verse 34Thanne the kyng schal seie to hem, that schulen be on his riythalf, Come ye, the blessid of my fadir, take ye in possessioun the kyngdoom maad redi to you fro the makyng of the world.Verse 35For Y hungride, and ye yauen me to ete; Y thristide, and ye yauen me to drynke; Y was herboreles, and ye herboriden me;Verse 36nakid, and ye hiliden me; sijk, and ye visitiden me; Y was in prisoun, and ye camen to me.Verse 37Thanne iust men schulen answere to hym, and seie, Lord, whanne siyen we thee hungry, and we fedden thee; thristi, and we yauen to thee drynk?Verse 38and whanne sayn we thee herborles, and we herboreden thee; or nakid, and we hiliden thee?Verse 39or whanne sayn we thee sijk, or in prisoun, and we camen to thee?Verse 40And the kyng answerynge schal seie to hem, Treuli Y seie to you, as longe as ye diden to oon of these my leeste britheren, ye diden to me.Verse 41Thanne the kyng schal seie also to hem, that schulen be on his lefthalf, Departe fro me, ye cursid, in to euerlastynge fijr, that is maad redi to the deuel and hise aungels.Verse 42For Y hungride, and ye yauen not me to ete; Y thristide, and ye yauen not me to drynke;Verse 43Y was herborles, and ye herberden not me; nakid, and ye keuerden not me; sijk, and in prisoun, and ye visitiden not me.Verse 44Thanne and thei schulen answere to hym, and schulen seie, Lord, whanne sayn we thee hungrynge, or thristynge, or herboreles, or nakid, or sijk, or in prisoun, and we serueden not to thee?Verse 45Thanne he schal answere to hem, and seie, Treuli Y seie to you, `hou longe ye diden not to oon of these leeste, nether ye diden to me.Verse 46And these schulen goo in to euerlastynge turment; but the iust men schulen go in to euerlastynge lijf.