Matthew 22 — W88
22Verse 1And Jhesus answeride, and spak eftsoone in parablis to hem,Verse 2and seide, The kyngdom of heuenes is maad lijk to a kyng that made weddyngis to his sone.Verse 3And he sente hise seruauntis for to clepe men that weren bode to the weddyngis, and thei wolden not come.Verse 4Eftsoone he sente othere seruauntis, and seide, Seie ye to the men that ben bode to the feeste, Lo! Y haue maad redi my meete, my bolis and my volatilis ben slayn, and alle thingis ben redy; come ye to the weddyngis.Verse 5But thei dispisiden, and wenten forth, oon in to his toun, anothir to his marchaundise.Verse 6But othere helden his seruauntis, and turmentiden hem, and slowen.Verse 7But the kyng, whanne he hadde herd, was wroth; and he sente hise oostis, and he distruyede tho manquelleris, and brente her citee.Verse 8Thanne he seide to hise seruauntis, The weddyngis ben redi, but thei that weren clepid to the feeste, weren not worthi.Verse 9Therfor go ye to the endis of weies, and whom euere ye fynden, clepe ye to the weddyngis.Verse 10And hise seruauntis yeden out in to weies, and gadriden togider alle that thei founden, good and yuele; and the bridale was fulfillid with men sittynge at the mete.Verse 11And the kyng entride, to se men sittynge at the mete; and he siye there a man not clothid with bride cloth.Verse 12And he seide to hym, Freend, hou entridist thou hidir with out bride clothis? And he was doumbe.Verse 13Thanne the kyng bad hise mynystris, Bynde hym bothe hondis and feet, and sende ye him in to vtmer derknessis; there schal be wepyng and grentyng of teeth.Verse 14For many ben clepid, but fewe ben chosun.Verse 15Thanne Farisees yeden awei, and token a counsel to take Jhesu in word.Verse 16And thei senden to hym her disciplis, with Erodians, and seien, Maister, we witen, that thou art sothefast, and thou techist in treuthe the weie of God, and thou chargist not of ony man, for thou biholdist not the persoone of men.Verse 17Therfor seie to vs, what it seemeth to thee. Is it leueful that tribute be youun to the emperoure, ether nay?Verse 18And whanne Jhesus hadde knowe the wickidnesse of hem, he seide, Ypocritis, what tempten ye me?Verse 19Schewe ye to me the prynte of the money. And thei brouyten to hym a peny.Verse 20And Jhesus seide to hem, Whos is this ymage, and the writyng aboue?Verse 21Thei seien to hym, The emperouris. Thanne he seide to hem, Therfor yelde ye to the emperoure tho thingis that ben the emperouris, and to God tho thingis that ben of God.Verse 22And thei herden, and wondriden; and thei leften hym, and wenten awey.Verse 23In that dai Saduceis, that seien there is no risyng ayen to lijf, camen to hym, and axiden him,Verse 24and seiden, Mayster, Moises seide, if ony man is deed, not hauynge a sone, that his brother wedde his wijf, and reise seed to his brothir.Verse 25And seuen britheren weren at vs; and the firste weddide a wijf, and is deed. And he hadde no seed, and lefte his wijf to his brother;Verse 26also the secounde, and the thridde, til to the seuenthe.Verse 27But the laste of alle, the woman is deed.Verse 28Also in the risyng ayen to lijf, whos wijf of the seuene schal sche be? for alle hadden hir.Verse 29Jhesus answeride, and seide to hem, Ye erren, `and ye knowen not scripturis, ne the vertu of God.Verse 30For in the rysyng ayen to lijf, nether thei schulen wedde, nethir schulen be weddid; but thei ben as the aungels of God in heuene.Verse 31And of the risyng ayen of deed men, `han ye not red, that is seid of the Lord, that seith to you,Verse 32Y am God of Abraham, and God of Ysaac, and God of Jacob? he is not God of deede men, but of lyuynge men.Verse 33And the puple herynge, wondriden in his techynge.Verse 34And Fariseis herden that he hadde put silence to Saduceis, and camen togidere.Verse 35And oon of hem, a techere of the lawe, axide Jhesu, and temptide him,Verse 36Maistir, which is a greet maundement in the lawe?Verse 37Jhesus seide to him, Thou schalt loue thi Lord God, of al thin herte, and in al thi soule, and in al thi mynde.Verse 38This is the firste and the moste maundement.Verse 39And the secounde is lijk to this; Thou schalt loue thi neiyebore as thi silf.Verse 40In these twey maundementis hangith al the lawe and the profetis.Verse 41And whanne the Farisees weren gederid togidere, Jhesus axide hem,Verse 42and seide, What semeth to you of Crist, whos sone is he? Thei seien to hym, Of Dauid.Verse 43He seith to hem, Hou thanne Dauid in spirit clepith hym Lord,Verse 44and seith, The Lord seide to my Lord, Sitte on my riythalf, til Y putte thin enemyes a stool of thi feet?Verse 45Thanne if Dauid clepith hym Lord, hou is he his sone?Verse 46And no man miyte answere a word to hym, nethir ony man was hardi fro that day, to axe hym more.