Matthew 17 — W88
17Verse 1And after sixe daies Jhesus took Petre, and James, and Joon, his brother, and ledde hem aside in to an hiy hil,Verse 2and was turned in to an othir licnesse bifor hem. And his face schone as the sunne; and hise clothis weren maad white as snowe.Verse 3And lo! Moises and Elie apperiden to hem, and spaken with hym.Verse 4And Petre answeride, and seide to Jhesu, Lord, it is good vs to be here. If thou wolt, make we here thre tabernaclis; to thee oon, to Moises oon, and oon to Elye. Yit the while he spak, lo!Verse 5a briyt cloude ouerschadewide hem; and lo! a voice out of the cloude, that seide, This is my dereworth sone, in whom Y haue wel pleside to me; here ye hym.Verse 6And the disciplis herden, and felden doun on her faces, and dredden greetli.Verse 7And Jhesus cam, and touchide hem, and seide to hem, Rise vp, and nyle ye drede.Verse 8And thei liften vp her iyen, and saien no man, but Jhesu aloone.Verse 9And as thei camen doun of the hille, Jhesus comaundide to hem, and seide, Seie ye to no man the visioun, til mannus sone rise ayen fro deeth.Verse 10And his disciplis axiden hym, and seiden, What thanne seien the scribis, that it bihoueth that Elie come first?Verse 11He answeride, and seide to hem, Elie schal come, and he schal restore alle thingis.Verse 12And Y seie to you, that Elie is nowe comun, and thei knewen hym not, but thei diden in him what euer thingis thei wolden; and so mannus sone schal suffre of hem.Verse 13Thanne the disciplis vndurstoden, that he seide to hem of Joon Baptist.Verse 14And whanne he cam to the puple, a man cam to hym, and felde doun on hise knees bifor hym, and seide, Lord, haue merci on my sone; for he is lunatike, and suffrith yuele, for ofte tymes he fallith in to the fier, and ofte tymes in to water.Verse 15And Y brouyte hym to thi disciplis, and thei myyten not heele hym.Verse 16Jhesus answeride, and seide, A! thou generacion vnbileueful and weiward; hou long schal Y be with you? hou long schal Y suffre you? Brynge ye hym hider to me.Verse 17And Jhesus blamede hym, and the deuel wente out fro hym; and the child was heelid fro that our.Verse 18Thanne the disciplis camen to Jhesu priueli, and seiden to hym, Whi myyten not we caste hym out?Verse 19Jhesus seith to hem, For youre vnbileue. Treuli Y seie to you, if ye han feith, as a corn of seneueye, ye schulen seie to this hil, Passe thou hennus, and it schal passe; and no thing schal be vnpossible to you;Verse 20but this kynde is not caste out, but bi preiyng and fastyng.Verse 21And whilis thei weren abidynge togidere in Galilee, Jhesus seide to hem, Mannus sone schal be bitraied in to the hondis of men;Verse 22and thei schulen sle hym, and the thridde day he schal rise ayen to lijf.Verse 23And thei weren ful sori.Verse 24And whanne thei camen to Cafarnaum, thei that token tribute, camen to Petre, and seiden to hym, Youre maister payeth not tribute?Verse 25And he seide, Yhis. And whanne he was comen in to the hous, Jhesus cam bifor hym, and seide, Symount, what semeth to thee? Kyngis of erthe, of whom taken thei tribute? of her sones, ether of aliens?Verse 26And he seide, Of aliens. Jhesus seide to hym, Thanne sones ben fre.Verse 27But that we sclaundre hem not, go to the see, and caste an hook, and take thilke fisch that first cometh vp; and, whanne his mouth is opened, thou schalt fynde a stater, and yyue for thee and for me.