Mark 10 — W88
10Verse 1And Jhesus roos vp fro thennus, and cam in to the coostis of Judee ouer Jordan; and eftsoones the puple cam togidere to hym, and as he was wont, eftsoone he tauyte hem.Verse 2And the Farisees camen, and axiden hym, Whether it be leueful to a man to leeue his wijf? and thei temptiden hym.Verse 3And he answeride, and seide to hem, What comaundide Moises to you?Verse 4And thei seiden, Moises suffride to write a libel of forsaking, and to forsake.Verse 5`To whiche Jhesus answeride, and seide, For the hardnesse of youre herte Moises wroot to you this comaundement.Verse 6But fro the bigynnyng of creature God made hem male and female;Verse 7and seide, For this thing a man schal leeue his fadir and modir,Verse 8and schal drawe to hys wijf, and thei schulen be tweyne in o flesch. And so now thei ben not tweyne, but o flesch.Verse 9Therfor that thing that God ioynede togidere, no man departe.Verse 10And eftsoone in the hous hise disciplis axiden hym of the same thing.Verse 11And he seide to hem, Who euer leeuith his wijf, and weddith another, he doith auowtri on hir.Verse 12And if the wijf leeue hir housebonde, and be weddid to another man, sche doith letcherie.Verse 13And thei brouyten to hym litle children, that he schulde touche hem; and the disciplis threteneden the men, that brouyten hem.Verse 14And whanne Jhesus hadde seyn hem, he baar heuy, and seide to hem, Suffre ye litle children to come to me, and forbede ye hem not, for of suche is the kyngdom of God.Verse 15Treuli Y seie to you, who euer resseyueth not the kyngdom of God as a litil child, he schal not entre in to it.Verse 16And he biclippide hem, and leide hise hondis on hem, and blisside hem.Verse 17And whanne Jhesus was gon out in the weie, a man ranne bifore, and knelide bifor hym, and preiede hym, and seide, Good maister, what schal Y do, that Y resseyue euerlastynge lijf?Verse 18And Jhesus seide to hym, What seist thou, that Y am good? Ther is no man good, but God hym silf.Verse 19Thou knowist the comaundementis, do thou noon auowtrie, `sle not, stele not, seie not fals witnessyng, do no fraude, worschipe thi fadir and thi modir.Verse 20And he answeride, and seide to hym, Maister, Y haue kept alle these thingis fro my yongthe.Verse 21And Jhesus bihelde hym, and louede hym, and seide to hym, O thing faileth to thee; go thou, and sille alle thingis that thou hast, and yyue to pore men, and thou schalt haue tresoure in heuene; and come, sue thou me.Verse 22And he was ful sori in the word, and wente awei mornyng, for he hadde many possessiouns.Verse 23And Jhesus bihelde aboute, and seide to hise disciplis, Hou hard thei that han ritchessis schulen entre in to the kyngdom of God.Verse 24And the disciplis weren astonyed in hise wordis. And Jhesus eftsoone answeride, and seide `to hem, Ye litle children, hou hard it is for men that tristen in ritchessis to entre in to the kyngdom of God.Verse 25It is liyter a camele to passe thorou a nedlis iye, than a riche man to entre in to the kyngdom of God.Verse 26And thei wondriden more, and seiden among hem silf, And who may be sauyd?Verse 27And Jhesus bihelde hem, and seide, Anentis men it is impossible, but not anentis God; for alle thingis ben possible anentis God.Verse 28And Petir bigan to seie to hym, Lo! we han left alle thingis, and han sued thee.Verse 29Jhesus answeride, and seide, Treuli Y seie to you, ther is no man that leeueth hous, or britheren, or sistris, or fadir, or modir, or children, or feeldis for me and for the gospel,Verse 30which schal not take an hundrid fold so myche now in this tyme, housis, and britheren, and sistris, and modris, and children, and feeldis, with persecuciouns, and in the world to comynge euerlastynge lijf.Verse 31But many schulen be, the firste the last, and the last the firste.Verse 32And thei weren in the weie goynge vp to Jerusalem; and Jhesus wente bifor hem, and thei wondriden, and foleweden, and dredden. And eftsoone Jhesus took the twelue, and bigan to seie to hem, what thingis weren to come to hym.Verse 33For lo! we stien to Jerusalem, and mannus sone schal be bitraied to the princis of prestis, and to scribis, and to the eldre men; and thei schulen dampne hym bi deth, and thei schulen take hym to hethene men. And thei schulen scorne hym,Verse 34and bispete hym, and bete him; and thei schulen sle hym, and in the thridde dai he schal rise ayen.Verse 35And James and Joon, Zebedees sones, camen to hym, and seiden, Maister, we wolen, that what euer we axen, thou do to vs.Verse 36And he seide to hem, What wolen ye that Y do to you?Verse 37And thei seiden, Graunte to vs, that we sitten `the toon at thi riythalf, and the tother at thi left half, in thi glorie.Verse 38And Jhesus seide to hem, Ye witen not what ye axen; moun ye drynke the cuppe, which Y schal drynke, or be waischun with the baptym, in which Y am baptisid?Verse 39And thei seiden to hym, We moun. And Jhesus seide to hem, Ye schulen drynke the cuppe that Y drynke, and ye schulen be waschun with the baptym, in which Y am baptisid;Verse 40but to sitte at my riythalf or lefthalf is not myn to yyue to you, but to whiche it is maad redi.Verse 41And the ten herden, and bigunnen to haue indignacioun of James and Joon.Verse 42But Jhesus clepide hem, and seide to hem, Ye witen, that thei that semen to haue prynshode of folkis, ben lordis of hem, and the princes of hem han power of hem.Verse 43But it is not so among you, but who euer wole be maad gretter, schal be youre mynyster;Verse 44and who euer wole be the firste among you, schal be seruaunt of alle.Verse 45For whi mannus sone cam not, that it schulde be mynystrid to hym, but that he schulde mynystre, and yyue his lijf ayenbiyng for manye.Verse 46And thei camen to Jerico; and whanne he yede forth fro Jerico, and hise disciplis, and a ful myche puple, Barthymeus, a blynde man, the sone of Thimei, sat bisidis the weie, and beggide.Verse 47And whanne he herde, that it is Jhesus of Nazareth, he bigan to crie, and seie, Jhesu, the sone of Dauid, haue merci on me.Verse 48And manye thretneden hym, that he schulde be stille; and he criede myche the more, Jhesu, the sone of Dauid, haue merci on me.Verse 49And Jhesus stood, and comaundide hym to be clepid; and thei clepen the blynde man, and seien to hym, Be thou of betere herte, rise vp, he clepith thee.Verse 50And he castide awei his cloth, and skippide, and cam to hym.Verse 51And Jhesus answeride, and seide to hym, What wolt thou, that Y schal do to thee? The blynde man seide to hym, Maister, that Y se.Verse 52Jhesus seide to hym, Go thou, thi feith hath maad thee saaf. And anoon he saye, and suede hym in the weie.