Luke 24 — W88
24Verse 1But in o dai of the woke ful eerli thei camen to the graue, and brouyten swete smellynge spices, that thei hadden arayed.Verse 2And thei founden the stoon turned awei fro the graue.Verse 3And thei yeden in, and founden not the bodi of the Lord Jhesu.Verse 4And it was don, the while thei weren astonyed in thouyt of this thing, lo! twei men stoden bisidis hem in schynynge cloth.Verse 5And whanne thei dredden, and boweden her semblaunt in to the erthe, thei seiden to hem, What seken ye hym that lyueth with deed men?Verse 6He is not here, but is risun. Haue ye mynde, hou he spak to you, whanne he was yit in Galile,Verse 7and seide, For it bihoueth mannys sone to be bitakun in to the hondis of synful men, and to be crucified, and the thridde dai to rise ayen.Verse 8And thei bithouyten on hise wordis.Verse 9And thei yeden ayen fro the graue, and telden alle these thingis to the enleuene, and to alle othir.Verse 10And ther was Marie Mawdeleyn, and Joone, and Marie of James, and other wymmen that weren with hem, that seiden to apostlis these thingis.Verse 11And these wordis weren seyn bifor hem as madnesse, and thei bileueden not to hem.Verse 12But Petir roos vp, and ran to the graue; and he bowide doun, and say the lynen clothis liynge aloone. And he wente bi him silf, wondrynge on that that was don.Verse 13And lo! tweyne of hem wenten in that dai in to a castel, that was fro Jerusalem the space of sixti furlongis, bi name Emaws.Verse 14And thei spaken togidir of alle these thingis that haddun bifallun.Verse 15And it was don, the while thei talkiden, and souyten bi hem silf, Jhesus hym silf neiyede, and wente with hem.Verse 16But her iyen weren holdun, that thei knewen him not.Verse 17And he seide to hem, What ben these wordis, that ye speken togidir wandrynge, and ye ben sorewful?Verse 18And oon, whos name was Cleofas, answerde, and seide, Thou thi silf art a pilgrym in Jerusalem, and hast thou not knowun, what thingis ben don in it in these daies?Verse 19To whom he seide, What thingis? And thei seiden to hym, Of Jhesu of Nazareth, that was a man prophete, myyti in werk and word bifor God and al the puple;Verse 20and hou the heiyest preestis of oure princis bitoken hym in to dampnacioun of deeth, and crucifieden hym.Verse 21But we hopiden, that he schulde haue ayenbouyt Israel. And now on alle these thingis the thridde dai is to dai, that these thingis weren don.Verse 22But also summe wymmen of ouris maden vs afered, whiche bifor dai weren at the graue; and whanne his bodi was not foundun,Verse 23thei camen, and seiden, that thei syen also a siyt of aungels, whiche seien, that he lyueth.Verse 24And summe of oure wenten to the graue, and thei founden so as the wymmen seiden, but thei founden not hym.Verse 25And he seide to hem, A! foolis, and slowe of herte to bileue in alle thingis that the prophetis han spokun.Verse 26Whethir it bihofte not Crist to suffre these thingis, and so to entre in to his glorie?Verse 27And he bigan at Moises and at alle the prophetis, and declaride to hem in alle scripturis, that weren of hym.Verse 28And thei camen nyy the castel, whidur thei wenten. And he made countenaunce that he wolde go ferthere.Verse 29And thei constreyneden hym, and seiden, Dwelle with vs, for it drawith to nyyt, and the dai is now bowid doun.Verse 30And he entride with hem. And it was don, while he sat at the mete with hem, he took breed, and blesside, and brak, and took to hem.Verse 31And the iyen of hem weren openyd, and thei knewen hym; and he vanyschide fro her iyen.Verse 32And thei seiden togidir, Whether oure herte was not brennynge in vs, while he spak in the weie, and openyde to vs scripturis?Verse 33And thei risen vp in the same our, and wenten ayen in to Jerusalem, and founden the enleuene gaderid togidir, and hem that weren with hem,Verse 34seiynge, That the Lord is risun verrili, and apperide to Symount.Verse 35And thei tolden what thingis weren don in the weie, and hou thei knewen hym in brekyng of breed.Verse 36And the while thei spaken these thingis, Jhesus stood in the myddil of hem, and seide to hem, Pees to you; Y am, nyle ye drede.Verse 37But thei weren affraied and agast, and gessiden hem to se a spirit.Verse 38And he seide to hem, What ben ye troblid, and thouytis comen vp in to youre hertis?Verse 39Se ye my hoondis and my feet, for Y my silf am. Fele ye, and se ye; for a spirit hath not fleisch and boonys, as ye seen that Y haue.Verse 40And whanne he hadde seid this thing, he schewide hoondis and feet to hem.Verse 41And yit while thei bileueden not, and wondriden for ioye, he seide, Han ye here ony thing that schal be etun?Verse 42And thei proferden hym a part of a fisch rostid, and an hony combe.Verse 43And whanne he hadde etun bifore hem, he took that that lefte, and yaf to hem;Verse 44and seide `to hem, These ben the wordis that Y spak to you, whanne Y was yit with you; for it is nede that alle thingis ben fulfillid, that ben writun in the lawe of Moises, and in prophetis, and in salmes, of me.Verse 45Thanne he openyde to hem wit, that thei schulden vnderstonde scripturis.Verse 46And he seide to hem, For thus it is writun, and thus it bihofte Crist to suffre, and ryse ayen fro deeth in the thridde dai;Verse 47and penaunce and remyssioun of synnes to be prechid in his name `in to alle folkis, bigynnynge at Jerusalem.Verse 48And ye ben witnessis of these thingis.Verse 49And Y schal sende the biheest of my fadir in to you; but sitte ye in the citee, til that ye be clothid with vertu from an hiy.Verse 50And he ledde hem forth in to Betanye, and whanne his hondis weren lift vp, he blesside hem.Verse 51And it was don, the while he blesside hem, he departide fro hem, and was borun in to heuene.Verse 52And thei worschipiden, and wenten ayen in to Jerusalem with greet ioye,Verse 53and weren euermore in the temple, heriynge and blessynge God.