Leviticus 24 — W88
24Verse 1And the Lord spak to Moises, and seide, Comaunde thou to the sones of Israel,Verse 2that thei brynge to thee oile of olyues, pureste oile, and briyt, to the lanternes to be ordeyned contynueli with out the veil of witnessyng,Verse 3in the tabernacle of boond of pees; and Aaron schal araye tho lanternes fro euentid `til to euentid bifor the Lord, bi religioun and custom euerlastynge in youre generaciouns;Verse 4tho schulen be set euere on a clenneste candilstike in the siyt of the Lord.Verse 5Also thou schalt take wheete flour, and thou schalt bake therof twelue looues, which schulen haue ech bi hem silf twei tenthe partis,Verse 6of whiche thou schalt sette sexe on euer eithir side, on a clenneste boord bifor the Lord;Verse 7and thou schalt sette clereste encense on tho looues, that the looues be in to mynde of offryng of the Lord;Verse 8bi ech sabat tho schulen be chaungid bifor the Lord, and schulen be takun of the sones of Israel bi euerlastynge boond of pees;Verse 9and tho schulen be Aarons and hise sones, that thei ete tho in the hooli place, for it is hooli of the noumbre of hooli thingis, of the sacrifices of the Lord, bi euerlastynge lawe.Verse 10Lo! forsothe the sone of a womman of Israel, whom sche childide of a man Egipcian, yede out among the sones of Israel, and chidde in the castels with a man of Israel,Verse 11and whanne he hadde blasfemyd the name of the Lord, and hadde cursid the Lord, he was brouyt to Moises; forsothe his modir was clepid Salumyth, the douytir of Dabry, of the lynage of Dan;Verse 12and thei senten hym to prisoun, til thei wisten what the Lord comaundide.Verse 13And the Lord spak to Moises and seide,Verse 14Lede out the blasfemere without the castels, and alle men that herden, sette her hondis on his heed, and al the puple stone hym.Verse 15And thou schalt speke to the sones of Israel, A man that cursith his God,Verse 16schal bere his synne, and he that blasfemeth the name of the Lord, die bi deeth; al the multitude of the puple schal oppresse hym with stoonus, whether he that blasfemede the name of the Lord is a citeseyn, whether a pilgrym, die he bi deeth.Verse 17He that smytith and sleeth a man, die bi deeth;Verse 18he that smytith a beeste, yelde oon in his stide, that is, lijf for lijf.+Verse 19If a man yyueth a wem+to ony of hise citeseyns, as he dide, so be it don to him;Verse 20he schal restore brekyng for brekyng, iye for iye, tooth for tooth; what maner wem he yaf, he schal be compellid to suffre sich a wem.Verse 21He that smytith werk beeste, yeelde another; he that smytith a man, schal be punyschid.+Verse 22Euene doom be among you, whether a pilgrym ethir a citeseyn synneth, for Y am youre Lord God.Verse 23And Moyses spak to the sones of Israel, and thei brouyten forth out of the castels hym that blasfemede, and oppressiden with stoonus. And the sones of Israel diden, as the Lord comaundide to Moyses.