Genesis 34 — W88
34Verse 1Forsothe Dyna, the douytir of Lya, yede out to se the wymmen of that cuntrey.Verse 2And whanne Sichem, the sone of Emor Euey, the prince of that lond, hadde seyn hir, he louede hir, and rauyschide, and sclepte with hir, and oppresside the virgyn bi violence.Verse 3And his soule was boundun faste with hir, and he pleside hir sory with flateringis.Verse 4And he yede to Emor,Verse 5his fadir, and seide, Take to me this damysel a wijf. And whanne Jacob hadde herd this thing, while the sones weren absent, and ocupied in the fedyng of scheep, he was stille, til thei camen ayen.Verse 6Sotheli whanne Emor, the fadir of Sichem, was gon out, `that he schulde speke to Jacob, lo!Verse 7hise sones camen fro the feeld. And whanne this thing that bifelde was herd, thei weren wroothe greetli; for he wrouyte a foul thing in Israel, and he hadde do a thing vnleueful in the defoulyng of the douyter of Jacob.Verse 8And so Emor spak to hem, The soule of my sone Sichem cleuyde to youre douytir, yeue ye hir a wijf to hym,Verse 9and ioyne we weddyngis to gidere; yyue ye youre douytris to vs,Verse 10and take ye oure douytris, and dwelle ye with vs; the lond is in youre power, tile ye, make ye marchaundise, and welde ye it.Verse 11But also Sichem seide to the fadir and britheren of hir, Fynde Y grace bifor you, and what euer thingis ye ordeynen Y schal yyue;Verse 12encreesse ye the dower, and axe ye yiftis, Y schal yyue wilfull that that ye axen; oonli yyue ye this damysele a wijf to me.Verse 13The sones of Jacob answeriden in gile to Sichem and his fadir, and weren feerse for the defoulyng of maidenhod of the sistir,Verse 14We moun not do this that ye axen, nether we moun yyue oure sistir to a man vncircumcidid, which thing is vnleueful and abhomynable anentis vs.Verse 15But in this we schulen mowe be boundun in pees, if ye wole be lijk vs, and ech of male kynde be circumcidid in you,Verse 16thanne we schulen yyue and take togidre oure douytris and youre; and we schulen dwelle with you, and we schulen be o puple.Verse 17Forsothe if ye nylen be circumcidid, we schulen take oure douytir, and schulen go a wei.Verse 18The profryng of hem pleside Emor and Sichem,Verse 19his sone, and the yong wexynge man dilaiede not, that ne he fillide anoon that that was axid, for he louede the damysele greetli, and he was noble in al `the hous of his fadir.Verse 20And thei entriden in to the yate of the citee, and spaken to the puple,Verse 21These men ben pesible, and wolen dwelle with vs; make thei marchaundie in the loond, and tile thei it, which is large and brood, and hath nede to tileris; we schulen take her douytris to wyues, and we schulen yyue oure douytris to hem.Verse 22O thing is, for which so greet good is dilaied; if we circumciden oure malis, and suen the custom of the folc,Verse 23bothe her substaunce, and scheep, and alle thingis which thei welden, schulen be oure; oneli assente we in this, that we dwelle to gidere, and make o puple.Verse 24And alle men assentiden, and alle malis weren circumcidid.Verse 25And lo! in the thridde day, whanne the sorewe of woundis was moost greuous, twei sones of acob, Symeon and Leuy, britheren of Dyna, token swerdis, and entriden in to the citee booldeli; and whanne alle malis weren slayn,Verse 26thei killiden Emor and Sichem togidere, and token Dyna, her sistir, fro the hous of Sichem.Verse 27And whanne thei weren goon out, othere sones of Jacob felden in on the slayn men, and rifeliden the citee for the veniaunce of defoulyng of a virgyn.Verse 28And thei wastiden the scheep of tho men, and droues of oxun, and assis, and alle thingis that weren in howsis and feeldis,Verse 29and ledden prisoneris the litle children, and wyues of tho men.Verse 30And whanne these thingis weren don hardili, Jacob seide to Symeon and Leuy, Ye han troblid me, and han maad me hateful to Cananeis and Fereseis, dwellers of this lond; we ben fewe, thei schulen be gaderid to gidere and schulen sle me, and Y schal be don a wey and myn hous.Verse 31Symeon and Leuy answeriden, Whether thei ouyten mysuse oure sistir as an hoore?