Genesis 22 — W88
22Verse 1And aftir that these thingis weren don, God assaiede Abraham, and seide to hym, Abraham! Abraham! He answerde, Y am present.Verse 2God seide to him, Take thi `sone oon gendrid, whom thou louest, Ysaac; and go into the lond of visioun, and offre thou hym there in to brent sacrifice, on oon of the hillis whiche Y schal schewe to thee.Verse 3Therfor Abraham roos bi niyt, and sadlide his asse, and ledde with hym twey yonge men, and Ysaac his sone; and whanne he hadde hewe trees in to brent sacrifice, he yede to the place which God hadde comaundid to him.Verse 4Forsothe in the thridde dai he reiside hise iyen, and seiy a place afer;Verse 5and he seide to hise children, Abide ye here with the asse, Y and the child schulen go thidur; and aftir that we han worschipid, we schulen turne ayen to you.Verse 6And he took the trees of brent sacrifice, and puttide on Ysaac his sone; forsothe he bar fier, and a swerd in hise hondis. And whanne thei tweyne yeden togidere, Isaac seide to his fadir, My fadir!Verse 7And he answerde, What wolt thou, sone? He seide, Lo! fier and trees, where is the beeste of brent sacrifice?Verse 8Abraham seide, My sone, God schal puruey to hym the beeste of brent sacrifice.Verse 9Therfor thei yeden to gidere, and camen to the place whiche God hadde schewid to hym, in which place Abraham bildide an auter, and dresside trees a boue; and whanne he hadde bounde to gidere Ysaac, his sone, he puttide Ysaac in the auter, on the heep of trees.Verse 10And he helde forth his hond, and took the swerd to sacrifice his sone.Verse 11And lo! an aungel of the Lord criede fro heuene, and seide, Abraham! Abraham!Verse 12Which answerde, I am present. And the aungel seide to hym, Holde thou not forth thin honde on the child, nether do thou ony thing to him; now Y haue knowe that thou dredist God, and sparidist not thin oon gendrid sone for me.Verse 13Abraham reiside hise iyen, and he seiy `bihynde his bak a ram cleuynge bi hornes among breris, which he took, and offride brent sacrifice for the sone.Verse 14And he clepide the name of that place, The Lord seeth; wherfore it is seyd, til to dai, The Lord schal see in the hil.Verse 15Forsothe the aungel of the Lord clepide Abraham the secounde tyme fro heuene,Verse 16and seide, The Lord seith, Y haue swore bi my silf, for thou hast do this thing, and hast not sparid thin oon gendrid for me,Verse 17Y schal blesse thee, and Y schal multiplie thi seed as the sterris of heuene, and as grauel which is in the brynk of the see; thi seed schal gete the yatis of hise enemyes;Verse 18and alle the folkis of erthe schulen be blessid in thi seed, for thou obeiedist to my vois.Verse 19Abraham turnede ayen to hise children, and thei yeden to Bersabee to gidere, and he dwellide there.Verse 20And so whanne these thingis weren don, it was teld to Abraham that also Melcha hadde bore sones to Nachor his brother;Verse 21Hus the firste gendrid, and Buz his brothir, and Chamuhel the fadir of Sireis,Verse 22and Cased, and Asan, and Feldas,Verse 23and Jedlaf, and Batuhel, of whom Rebecca was borun; Melcha childide these eiyte to Nachor brother of Abraham.Verse 24Forsothe his concubyn, Roma bi name, childide Thabee, and Gaon, and Thaas, and Maacha.