Exodus 15 — W88
15Verse 1Thanne Moises song, and the sones of Israel, this song to the Lord; and thei seiden, Synge we to the Lord, for he is magnefied gloriousli; he castide doun the hors and the stiere in to the see.Verse 2My strengthe and my preisyng is the Lord; and he is maad to me in to heelthe. This is my God, and Y schal glorifie hym; the God of my fadir, and Y schal enhaunse hym.Verse 3The Lord is as a man fiyter, his name is Almiyti;Verse 4he castide doun in to the see the charis of Farao, and his oost. Hise chosun princis weren drenchid in the reed see;Verse 5the depe watris hiliden hem; thei yeden doun in to the depthe as a stoon.Verse 6Lord, thi riythond is magnyfied in strengthe; Lord, thi riythond smoot the enemye.Verse 7And in the mychilnesse of thi glorie thou hast put doun alle myn+aduersaries; thou sentist thin ire, that deuouride hem as stobil.Verse 8And watris weren gaderid in the spirit of thi woodnesse; flowinge watir stood, depe watris weren gaderid in the middis of the see.Verse 9The enemy seide, Y schal pursue, and Y schal take; Y schal departe spuylis, my soule schal be fillid. I schal drawe out my swerde; myn hond schal sle hem.Verse 10Thi spirit blew, and the see hilide hem; thei weren drenchid as leed in grete watris.Verse 11Lord, who is lijk thee in stronge men, who is lijk thee? thou art greet doere in hoolynesse; ferdful, and preisable, and doynge myraclis.Verse 12Thou heldist forth thin hond, and the erthe deuouride hem;Verse 13thou were ledere in thi merci to thy puple, which thou ayen bouytist; and thou hast bore hym in thi strengthe to thin holi dwellyng place.Verse 14Puplis stieden, and weren wroothe; sorewis helden the dwelleris of Filistiym.Verse 15Thanne the pryncis of Edom weren disturblid; tremblyng held the stronge men of Moab.Verse 16Alle the dwelleris of Canaan `weren starke; inward drede falle on hem, and outward drede in the greetnesse of thin arm. Be thei maad vnmouable as a stoon, til thi puple passe, Lord; til this thi puple passe, whom thou weldidist.Verse 17Thou schalt brynge hem in, and thou schalt plaunte in the hil of thin eritage; in the moost stidefast dwellyng place which thou hast wrouyt, Lord; Lord, thi seyntuarie, which thin hondis made stidefast.Verse 18The Lord schal `regne in to the world and ferthere.Verse 19Forsothe Farao, `a ridere, entride with his charis and knyytis in to the see, and the Lord brouyte the watris of the se on hem; sotheli the sones of Israel yeden bi the drie place, in the myddis of the see.Verse 20Therfore Marie, profetesse, the `sistir of Aaron, took a tympan in hir hond, and alle the wymmen yeden out aftir hyr with tympans and cumpanyes;Verse 21to whiche sche song bifore, and seide, Synge we to the Lord, for he is magnyfied gloriousli; he castide doun in to the see the hors and the stiere of hym.Verse 22Forsothe Moises took Israel fro the reed see, and thei yeden out in to the deseert of Sur, and thei yeden thre daies bi the wildirnesse, and thei founden not watir.Verse 23And thei camen in to Marath, and thei miyten not drynk the watris of Marath, for tho weren bittere; wherfor and he puttide a couenable name to the place, and clepide it Mara, that is, bitternesse.Verse 24And the puple grutchide ayens Moises, and seide, What schulen we drynke?Verse 25And Moises criede to the Lord, which schewide to hym a tre; and whanne he hadde put that tre in to watris, tho weren turned in to swetnesse. There the Lord ordeynede comaundementis and domes to the puple, and there he asayede the puple,Verse 26and seide, If thou schalt here the vois of thi Lord God, and schalt do that that is riytful byfore hym, and schalt obeie to his comaundementis, and schalt kepe alle hise heestis, Y schal not brynge yn on thee al the syknesse, which Y puttide in Egipt, for Y am thi Lord Sauyour.